Rossiya OAVlarida O‘zbekiston Prezidentining rasmiy samolyoti “AQSH harbiy samolyoti” deb ataldi
Vashingtondan parvoz qilgan va Rossiya hududi orqali uchgan layner Prezident Shavkat Mirziyoyevning Toshkentga qaytayotgan rasmiy borti bo‘lgan.
Rossiyaning ayrim Telegram kanallari hamda bir qator ommaviy axborot vositalarida AQSHdan havoga ko‘tarilib, Rossiya havo hududi orqali parvoz qilgan “noma’lum Boeing 787” haqida turli taxminiy xabarlar tarqatildi. Ayrim nashrlar ushbu bortni “AQSH harbiy-havo kuchlariga tegishli samolyot” sifatida talqin qilgan.
Ochiq manbalarda, jumladan parvozlarni kuzatish servislaridagi ma’lumotlarga tayanilgan holda, samolyot Vashington yaqinidagi Endryus aviabazasidan uchgani, Murmansk viloyati ustidan Rossiya havo hududiga kirgani va keyinchalik kuzatuv tizimlarida to‘liq aks etmagani haqida xabarlar berilgan. Shuningdek, ayrim manbalarda bort Qozog‘iston chegarasi tomon yo‘l olgani qayd etilgan.
Aslida esa mazkur layner O‘zbekiston Prezidenti Shavkat Mirziyoyevning rasmiy samolyoti bo‘lib, davlat rahbari AQSHga amalga oshirilgan tashrif doirasida “Tinchlik kengashi”ning birinchi sammitida ishtirok etgach, Toshkentga qaytayotgan bo‘lgan.
Mutaxassislarning ta’kidlashicha, hukumat delegatsiyalari va maxsus reyslar ko‘pincha ochiq kuzatuv platformalarida to‘liq yoki doimiy ravishda aks etmasligi amaliyotda keng uchraydigan holat hisoblanadi.
Ochiq manbalarga ko‘ra, samolyot Vashington shahridan Toshkent vaqti bilan 00:12 da havoga ko‘tarilgan hamda Kanada, Grenlandiya, Yevropa davlatlari, Rossiya va Qozog‘iston hududlari ustidan parvoz qilib, soat 12:14 da Toshkent shahriga yetib kelgan.
