Navoiyda noqonuniy saqlanayotgan 1100 dona patron musodara qilindi
Mazkur holat bo‘yicha jinoyat ishi qo‘zg‘atilgan va shaxsga “qamoq” ehtiyot chorasi qo‘llanilgan.
Navoiy viloyati, Konimex tumanida Davlat xavfsizlik xizmati boshqarmasi va Ichki ishlar organlari xodimlari hamkorligida o‘tkazilgan tezkor tadbir davomida Buxoro viloyati, G‘ijduvon tumanida yashovchi, 1989-yilda tug‘ilgan shaxsga tegishli “Onix” rusumli avtomobil ko‘zdan kechirilgan. Bu haqda DXX Zamon.uz'ga xabar berdi.
Tekshiruv natijasida avtomashina yukxonasida 500 dona 5,6 mm kalibrli otish uchun yaroqli patronlar topilgan va tegishli tartibda rasmiylashtirilgan. Shuningdek, tadbir davomida shaxsning yashash xonadonidan 600 dona 5,6 mm kalibrli patronlar topilgan. Shu tariqa, jami 1100 dona patron noqonuniy saqlanayotganligi aniqlangan.
Mazkur holat bo‘yicha Jinoyat kodeksining 248-moddasi 3-qismi (o‘qotar qurol, o‘q-dorilar, portlovchi moddalar va qurilmalarning qonunga xilof muomalasi) bo‘yicha jinoyat ishi qo‘zg‘atilgan va shaxsga “qamoq” ehtiyot chorasi qo‘llanilgan. Hozirda tergov harakatlari davom etmoqda, barcha dalillar rasmiy tartibda yig‘ilmoqda va tergov jarayonida qonuniy choralar ko‘rilmoqda.
