G‘allaorol hokimligi qishloq xo‘jaligi bo‘limi bosh mutaxassisi 6700 dollar olganida ushlandi
U fermer xo‘jaligiga tegishli 11 gektar yer maydonini sotish va hujjatlarni rasmiylashtirib berish evaziga pul talab qilgan.
Jizzax viloyati G‘allaorol tumanida yer maydonini noqonuniy sotish bilan bog‘liq korrupsion holat aniqlandi. Bu haqda DXX Zamon.uzga xabar berdi.
Ma’lum qilinishicha, tuman hokimligining qishloq xo‘jaligi bo‘limi bosh mutaxassisi o‘zining o‘g‘liga tegishli fermer xo‘jaligining 11 gektar yer maydonini xaridorga 11 ming AQSh dollariga sotishga kelishgan. U kelishuv doirasida oldindan 5 ming AQSh dollar olgan.
Shuningdek, u yerga oid tegishli hujjatlarni hokimlik hamda kadastr idoralaridagi tanishlari orqali rasmiylashtirib berish evaziga qolgan 6 ming AQSh dollari va qo‘shimcha 700 AQSh dollari, jami 6700 AQSh dollarini olayotgan vaqtida qo‘lga olingan.
Tezkor tadbir Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari hamkorligida o‘tkazilgan.
Mazkur holat yuzasidan bosh mutaxassisga nisbatan Jinoyat kodeksining 168-moddasi 3-qismi “a” bandi hamda 28, 211-moddasi 1-qismi bilan jinoyat ishi qo‘zg‘atilgan.
Hozirda ushbu jinoyat ishi doirasida tergov harakatlari olib borilmoqda.
