Jizzaxda Cobalt haydovchilari Hyundai avtomobilini to‘xtatib, ichidagi tadbirkorlarni kaltakladi
Hodisa oqibatida uch kishi tan jarohati olgan, shuningdek, avtomashinaga ham zarar yetkazilgan.
Joriy yilning 14-fevral kuni Jizzax viloyati Do‘stlik tumanida fuqarolarga nisbatan zo‘ravonlik bilan bog‘liq holat yuz berdi. Bu haqda viloyat Ichki ishlar boshqarmasi axborot xizmati ma’lum qildi.
Dastlabki ma’lumotlarga ko‘ra, ikkita Cobalt rusumli avtomashina Hyundai rusumli avtomobilni yo‘l chetiga qisib to‘xtatgan va bir guruh notanish shaxslar mashinaga kelib, haydovchi hamda yo‘lovchilarga nisbatan jismoniy zo‘ravonlik ishlatgan.
Oqibatda Qarshi shahri hamda Qarshi tumanida yashovchi, 1982, 1987 va 1989-yillarda tug‘ilgan tadbirkorlarga turli darajadagi tan jarohatlari yetkazilib, avtomashinaning o‘ng tomondagi ko'rsatkichi va old yon oynasi sindirilgan.
Olib borilgan tezkor-qidiruv tadbirlari natijasida mazkur jinoyatni sodir etishda gumon qilinayotgan shaxslar aniqlangan. Ular orasida Toshkent shahrining Sergeli, Chilonzor va Uchtepa tumanlarida, shuningdek, Toshkent viloyatining Zangiota tumanida istiqomat qiluvchi, 1990–2004-yillarda tug‘ilgan jami 7 nafar fuqaro borligi ma’lum qilingan.
Mazkur holat yuzasidan Jinoyat kodeksining 277-moddasi uchinchi qismi “g” bandi bilan jinoyat ishi qo‘zg‘atilgan. Hozirda gumonlanuvchilardan uch nafariga nisbatan qamoq ehtiyot chorasi qo‘llanilgan.
