O'zbekistonda har haftaning payshanba kuni “Yoshlar kuni” etib belgilandi

 

Ko‘ksaroy qarorgohida o‘tkazilayotgan yoshlar bilan muloqot davomida, joriy yilda Toshkent shahrida Jahon yoshlarining tinchlik sari harakati bosh qarorgohi tashkil etilishi, Samarqand shahrida Yoshlar parlamenti a’zolarining 12-global konferensiyasi, “Take Off” xalqaro startap sammiti hamda 46-Butunjahon shaxmat olimpiadasi o‘tkazilishi e’lon qilindi.

 

Prezident ta’lim tizimida sifatni oshirish, yangi metodika va innovatsiyalarni joriy etish masalasiga alohida to‘xtalib, “Albatta, yangi metodika va innovatsiya olib kirib, ta’lim sifatini oshirish va bolalarni kasbining ustasi qilish haqida izlanadigan rahbarning faoliyatida o‘zgarish bo‘ladi, ishiga yangicha muhit kiradi”, – deya ta’kidladi.

 

Dunyoda yoshlar ongini egallashga qaratilgan turli tahdidlar kuchayib borayotgan bir paytda barcha darajadagi rahbarlar yoshlar bilan ishlashning mutlaqo yangi tizimiga o‘tishi zarurligi qayd etildi.

 

Mamlakatimizda har haftaning payshanba kuni vazirlik, idora va hokimliklarda “Yoshlar kuni” etib belgilandi. Shu kuni mas’ul rahbarlar mahalla, maktab va texnikumlarga borib, yoshlarni tinglaydi hamda ularning muammolarini joyida hal etadi.

 

Shuningdek, hokimlar tomonidan yoshlarbop savdo-servis loyihalari amalga oshiriladi, yoshlarning ta’lim olishi, sport bilan shug‘ullanishi, kasb va xorijiy til o‘rganishi, ishga joylashishi yoki tadbirkorlik faoliyatini boshlashi uchun ko‘maklashiladi. Startap tashabbuskorlari bilan uchrashuvlar o‘tkazilib, alohida mablag‘ va grantlar ajratiladi.

 

Bundan tashqari, eng yaxshi tomorqachi, fermer, sanoatchi, startapchi, ijodkor hamda ma’naviyat va boshqa yo‘nalishlarda faol yoshlar o‘rtasida tanlovlar va yarmarkalar tashkil etilishi belgilandi.