O‘zbekistonda yosh oilalarga uy-joy ipotekasi bo‘yicha imtiyozlar beriladi
Kredit stavkasining 14 foizdan oshgan qismi byudjetdan qoplab beriladi.
O‘zbekistonda yosh oilalarni qo‘llab-quvvatlash maqsadida uy-joy ipoteka dasturi doirasida kredit stavkasining 14 foizdan oshgan qismi byudjetdan qoplab beriladi. Bu haqda 24-fevral kuni Prezident Shavkat Mirziyoyevning yoshlar bilan muloqotida ma’lum qilindi.
Davlat rahbari ta’kidlashicha, har yili respublikada 270 mingga yaqin yangi oila shakllanadi va ularga qulay hamda shinam uy-joy zarur. Shu bois, yosh oilalarga imtiyozli ipoteka kreditlari ajratiladi.
Bundan tashqari, yoshlar o‘rtasida kitobxonlikni rivojlantirish maqsadida “Kitobxonlik madaniyatini rivojlantirish” jamg‘armasi orqali eng iste’dodli yozuvchilarga ijodiy buyurtma beriladi va bir yil davomida oyiga 20 million so‘mdan haq to‘lanadi.
Eng sara xorijiy adabiyotlarni o‘zbek tiliga, milliy adabiyotlarni xorijiy tillarga tarjima qilish va chop etish xarajatining yarmi qoplanadi.
Mutasaddilarga yangi o‘quv yiligacha eng yaxshi 100 ta asardan iborat kitoblar to‘plamini tayyorlab, barcha maktab va texnikumlarga yetkazish topshirildi. Maktablardagi eng faol kitobxon o‘quvchilarga 10 million so‘mdan mukofot beriladi.
Kitob savdosini oyiga 10 ming donadan oshirgan tadbirkorlarga uch yilga 1 milliard so‘mgacha 7 foizli ssuda beriladi.
