Telegram'da bolalar pornografiyasini tarqatgan shaxslar ushlandi
Gumonlanuvchilar noqonuniy materiallarni ijtimoiy tarmoqlar orqali sotib, katta miqdorda daromad olgani aniqlangan.
Huquqni muhofaza qiluvchi organlar tomonidan o‘tkazilgan tezkor tadbirlar davomida Telegram messenjeri orqali voyaga yetmaganlar ishtirokidagi taqiqlangan pornografik materiallarni tarqatgan fuqarolar aniqlandi. Bu haqda IIV Kiberxavfsizlik markazi marbuot xizmati xabar berdi.
Jumladan, Jizzax viloyati Ichki ishlar boshqarmasi xodimlari tomonidan o‘tkazilgan tezkor tadbirda messenjerda voyaga yetmaganlar ishtirokidagi axloqsiz va pornografik mazmundagi materiallarni tarqatib kelgan shaxs aniqlangan. Ma'lum bo'lishicha, u 442 nafar obunachiga ega bo‘lgan kanal orqali jami 403 turdagi bolalar pornografik materiallarini tarqatgan.
Dastlabki surishtiruv jarayonida gumonlanuvchi qiziqish yuzasidan shunga o‘xshash kanallarga qo‘shilganidan so‘ng o‘zi ham kattalar va voyaga yetmaganlar ishtirokidagi noqonuniy videolar joylashtirilgan kanal tashkil etganini ma’lum qilgan hamda qilgan ishidan pushaymon ekanini bildirgan.
Shuningdek, Toshkent viloyatida yashovchi 21 yoshli fuqaro ham Telegram messenjerda qizlar nomidan 6 ta kanal ochib, ularga jami 3 750 ta pornografik material joylashtirgani aniqlangan. Tergovga qadar tekshiruvlarda uning boshqa ijtimoiy tarmoqlar orqali 837 nafar shaxsga voyaga yetmaganlar ishtirokidagi pornografik mahsulotlarni sotgani va 29,2 million so‘m miqdorida noqonuniy daromad olgani aniqlangan.
Mazkur holatlar yuzasidan Jinoyat kodeksining 130-moddasi 3-qismi bilan jinoyat ishlari qo‘zg‘atildi.
Hozirda gumonlanuvchilarga nisbatan qamoqqa olish tarzidagi ehtiyot chorasi qo‘llanilgan bo‘lib, tergov harakatlari davom ettirilmoqda.
