Toshkent viloyatida hokim yordamchisi 10 ming dollar bilan ushlandi
U davlat zaxirasidagi 4 sotix yerni hokimlikdagi tanishlari yordamida soxta ma’lumotlar asosida xaridor nomiga rasmiylashtirish evaziga 50 ming AQSh dollari talab qilgan.
Toshkent viloyati Qibray tumanida hokimning tadbirkorlikni rivojlantirish, aholi bandligini ta’minlash va kambag‘allikni qisqartirish masalalari bo‘yicha MFYdagi yordamchisining korrupsion harakati fosh etildi. Bu haqda DXX Zamon.uz' ga xabar berdi.
U MFY binosi yonida joylashgan, davlat zaxirasidagi 4 sotix yerni hokimlikdagi tanishlari yordamida arxiv hujjatlariga soxta ma’lumotlar kiritib, xaridor nomiga rasmiylashtirish evaziga 50 ming AQSh dollari talab qilgan.
Davlat xavfsizlik xizmatining Toshkent viloyati boshqarmasi va Iqtisodiy jinoyatlarga qarshi kurashish departamenti xodimlari tomonidan o‘tkazilgan tezkor tadbirda, u talab qilingan summaning 10 ming dollarini olgan vaqtida ushlandi va ashyo dalillar bilan qo‘lga olindi.
Hozirda hokim yordamchisi Jinoyat kodeksining 168-moddasi 4-qismi “a” bandi va 28,211-moddasi 3-qismi “a” bandi bilan jinoyat ishi qo‘zg‘atilgan, tergov harakatlari davom etmoqda.
