O‘zbekistondagi nufuzli bankning mansabdor xodimi qamoqqa olindi
U Toshkent viloyatida aniqlangan qariyb 73 milliard so‘mlik soliq qarzini “bartaraf qilib berish” evaziga ishlab chiqarish bilan shug‘ullanuvchi MChJdan 110 ming dollar talab qilgan.
Yetakchi tijorat banklaridan birining Amaliyot boshqarmasi boshlig‘i o‘rinbosariga nisbatan jinoyat ishi qo‘zg‘atildi. Bu haqda DXX Zamon.uz'ga xabar berdi.
Aniqlanishicha, ushbu mansabdor shaxs Toshkent viloyatida qurilish materiallari ishlab chiqarish bilan shug‘ullanuvchi MChJda viloyat Soliq boshqarmasi tomonidan o‘tkazilgan audit tekshiruvi yakunida aniqlangan 72 milliard 956 million so‘mlik soliq va boshqa majburiy to‘lovlarni yuqori lavozimda ishlovchi tanishlari orqali bartaraf qilib berish evaziga 110 ming AQSh dollari pul talab qilgan.
Davlat xavfsizlik xizmati, Iqtisodiy jinoyatlarga qarshi kurashish departamenti hamda ichki ishlar organlari hamkorligida o‘tkazilgan tezkor tadbir davomida bank mansabdor shaxsi kelishilgan pul mablag‘ining bir qismi — 30 ming AQSh dollarini olgan vaqtida ashyoviy dalillar bilan qo‘lga olingan.
Mazkur holat yuzasidan unga nisbatan Jinoyat kodeksining 168-moddasi 4-qismi “a” bandi hamda 28, 211-moddasi 3-qismi “a” bandi bilan jinoyat ishi qo‘zg‘atilib, “qamoq” ehtiyot chorasi qo‘llanilgan.
Hozirgi vaqtda mazkur holat bo‘yicha tergov harakatlari olib borilmoqda.
