Jizzax viloyatida ta’lim sohasi mansabdori pora olayotgan vaqtida qo‘lga tushdi
U Maktabgacha ta’lim tashkilotida tekshiruv o‘tkazmaslik evaziga muassasa rahbaridan 4 million 800 ming so‘m pul talab qilgan.
Korrupsiyaga qarshi kurashish yo‘nalishida Davlat xavfsizlik xizmati hamda prokuratura organlari xodimlari hamkorligida o‘tkazilgan tezkor tadbir davomida viloyat ta’lim tizimi mas’ullaridan birining noqonuniy harakatlari fosh etildi. Bu haqda DXX Zamon.uz' ga xabar berdi.
Aniqlanishicha, maktabgacha va maktab ta’limi bo‘limi boshlig‘i o‘z mansab vakolatini suiiste’mol qilib, davlat maktabgacha ta’lim tashkilotlaridan birida tekshiruv o‘tkazmaslik evaziga muassasa rahbaridan 4 million 800 ming so‘m miqdorida pora talab qilgan.
Mazkur mansabdor shaxs so‘ralgan pul mablag‘ini tamagirlik yo‘li bilan olayotgan vaqtida tezkor tadbir davomida ashyoviy dalillar bilan ushlangan.
Holat yuzasidan unga nisbatan Jinoyat kodeksining 210-moddasi 2-qismi “v” bandi bilan jinoyat ishi qo‘zg‘atilib, hozirda tergov harakatlari olib borilmoqda.
Shuningdek, tergov jarayonida mazkur shaxsning Jinoyat kodeksining 167, 209 hamda 243-moddalarida nazarda tutilgan boshqa noqonuniy harakatlari ham aniqlangan.
