Buxoroda “Xalq banki” mansabdori, Sirdaryoda MCHJ menejeri pora bilan qo‘lga tushdi
Kredit va uy-joy subsidiyasi soxtalashtirilishi bo‘yicha jinoyat ishlari qo‘zg‘atildi.
Davlat xavfsizlik xizmati va Iqtisodiy jinoyatlarga qarshi kurashish departamenti hamkorligida Buxoro va Sirdaryo viloyatlarida mansabdor shaxslarning firibgarlik harakatlari fosh etildi. Bu haqda DXX Zamon.uz' ga xabar berdi.
Buxoro viloyatida AT “Xalq banki” Romitan shahridagi standart bank xizmatlari markazi shoʼba mudiri xizmat mavqesidan foydalangan holda boshqa tijorat bankida ish olib boruvchi tanishlari orqali 800 mln so‘m miqdoridagi kredit mablag‘ini ajratish evaziga 2 000 AQSH dollari talab qilgan. Tezkor tadbir davomida u 1 000 AQSH dollarini uchinchi shaxs orqali olgan vaqtida ushlangan. Mansabdor shaxsga nisbatan Jinoyat kodeksining 25, 168-moddasi 3-qismi “v” bandi va 28, 192 prim 9-moddasi 1-qismi bilan jinoyat ishi qo‘zg‘atilgan, tergov harakatlari olib borilmoqda.
Sirdaryo viloyatida kuzatilgan holatda esa, tadbirkorlik subyektlariga mikroqarzlar berish bilan shug‘ullanuvchi MCHJning Guliston shahar filiali menejeri o‘zining hokimiyat tizimidagi mansabdor tanishlari orqali, Oqoltin tumanida yashovchi fuqaroga imtiyozli ravishda uy-joy olishi uchun subsidiya mablag‘i ajratilishida yordam berish evaziga 8 ming AQSH dollari talab qilgan va 96 mln so‘m olgan vaqtida DXX va IJQKD xodimlari tomonidan ushlangan. Unga nisbatan Jinoyat kodeksining 168-moddasi 2-qismi “a” bandi va 28, 211-moddasi 1-qismi bilan jinoyat ishi qo‘zg‘atilib, “qamoq” ehtiyot chorasi qo‘llanildi.
Hozirda har ikki holat bo‘yicha tergov harakatlari davom etmoqda.
