Termiz – Istanbul, Termiz – Dubay yo‘nalishlarida yangi reyslar qo'yiladi
Afg‘oniston va Tojikiston bilan bog‘laydigan 178 km magistral yo‘l kapital ta’mirga kiradi.
Prezident Shavkat Mirziyoyev raisligidagi Surxondaryo viloyatini yo‘l va transport infratuzilmasi jihatidan rivojlantirish bo‘yicha yig‘ilishida transport masalalarini hududning eng og‘riqli muammolaridan biri ekani qayd etildi.
Ikki yil oldin Osiyo taraqqiyot banki bilan 183 million dollar hisobiga Boysun va Denovni bog‘lovchi yo‘lning 111 kilometr qismini sement-beton qoplamaga o‘tkazish loyihasi boshlangan. Bu yo‘l ishga tushsa, yuk tashish hajmi ikki baravar oshadi va vaqt 3 soatdan 1,5 soatga qisqaradi.
O'zbekistonni Afg‘oniston va Tojikiston bilan bog‘laydigan 178 kilometrli magistral yo‘l 30 yildan buyon kapital ta’mirlanmagan. Mutasaddilarga qurilish ishlarini uch oy ichida boshlash topshirildi.
Toshkent–Termiz yo‘nalishidagi yo‘lovchi poyezdi 14 soatdan ko‘p harakatlanadi. Koreyalik hamkorlar bilan zamonaviy tezyurar poyezdlar olib kelish bo‘yicha kelishuvga erishilgan. “Toshg‘uzor–Boysun–Qumqo‘rg‘on” uchastkasini tezyurar poyezdga moslash bo‘yicha loyiha shu yil boshlanadi, 103 kilometr bo‘lgan “Qumqo‘rg‘on–Quduqli” temir yo‘lini elektrlashtirish ishlariga kirishiladi.
Yig'ilishda Termiz–Istanbul va Termiz–Dubay yo‘nalishlarida yangi reyslar qo‘yilishi belgilandi. Sho‘rchi, Denov, Sariosiyo, Sherobod va Boysundan kuniga 100 ming odam viloyat markaziga yengil mashinada kelib-ketmoqda. Surxondaryoga olib kelinayotgan 125 ta avtobus birinchi navbatda ushbu yo‘nalishlarga yo‘naltiriladi.
