Toshkent viloyatidagi bog‘chalarda bolalar zaharlanishi bo‘yicha 10 kishi qamoqqa olindi
1 kishiga uy qamog‘i tarzidagi ehtiyot chorasi qo‘llanilgan.
2025-yil 24-sentabr kuni Toshkent viloyatining Piskent, Bo‘ka, Bekobod, Quyichirchiq va Oqqo‘rg‘on tumanlarida maktabgacha taʼlim muassasalari tarbiyalanuvchilarining zaharlanish holatlari aniqlangan edi. Ushbu holat yuzasidan Toshkent viloyati Ichki ishlar bosh boshqarmasi huzuridagi tergov boshqarmasi tomonidan bir nechta autsorsing xizmatini ko‘rsatuvchi xususiy korxonalar mas’ul shaxslariga nisbatan jinoyat ishi qo‘zg‘atilgan edi. Bu haqda Oliy sud matbuot xizmati xabar berdi.
Jinoyat ishlari bo‘yicha Bo‘ka tuman sudiga kelib tushgan ishda 11 shaxs ayblanmoqda:
“Shark Milk Product” MCHJ direktori va rahbarlari (R.O., S.S., F.O., A.S., R.X., M.N., D.Q.); “Governess Business” MCHJ direktori (J.X.); “Kinder Garden Group” MCHJ direktori (F.D.); “Innavation Outsourcing Servise” MCHJ direktori (I.S.); “Nishon Invest” MCHJ direktori (B.R.).
Ayblanuvchilar Jinoyat kodeksining 186-moddasi 4-qismi “b” bandi (xavfsizlik talablariga javob bermaydigan tovarlarni ishlab chiqarish, saqlash yoki xizmat ko‘rsatish) va 257-1-moddasi 1-qismi (sanitariyaga oid qonunchilikni yoki epidemiyaga qarshi kurash qoidalarini buzish) bilan ayblanmoqda.
Hozirgi paytda 10 shaxsga qamoqqa olish, 1 shaxsga uy qamog‘i tarzidagi ehtiyot chorasi qo‘llanilgan. Jinoyat ishini ko‘rishni tayinlash masalasi hozirda o‘rganilmoqda.
