Uchtepa tumani prokurori yordamchisi 15 ming dollar olib, qochishga uringan paytida qo‘lga olindi
U ikkita uyning yerto'la qismini ijaraga berish evaziga tadbirkordan pul talab qilgan.
Davlat xavfsizlik xizmatining Toshkent shahar bo‘yicha boshqarmasi xodimlari tomonidan o‘tkazilgan tezkor tadbirda, 2025-yilning sentabr oyiga qadar Shayxontohur tumanida prokuror yordamchisi lavozimida ishlagan, hozirda Uchtepa tumanida shu lavozimni egallagan shaxs xizmat mavqeidan foydalanib, yakka tartibdagi tadbirkorga Shayxontohur tumanida joylashgan 2 ta uyning yerto‘la qismidagi noturar maydonlarni ijaraga olib berganligini ro‘kach qilib, undan 15 ming AQSH dollarini o‘ziga tegishli avtomashinada olib, hodisa joyidan qochishga uringan vaqtida ashyoviy dalillar bilan ushlandi. Bu haqda DXX Zamon.uz' ga xabar berdi.
Hozirda ushbu holat bo‘yicha Toshkent shahar prokuraturasi tomonidan prokuror yordamchisiga nisbatan Jinoyat kodeksining 168-moddasi (firibgarlik) 3-qismi “v” bandi bilan jinoyat ishi qo‘zg‘atilib, unga nisbatan “qamoq” ehtiyot chorasi qo‘llanilgan.
