Buxoroda Telegram’da onlayn fohishaxona tashkil qilgan yigit ushlandi
21 yoshli yigit messenjerida maxsus kanal tashkil etib, unda ayollarning suratlarini joylashtirgan va ularning xizmatlarini muayyan pul mablag‘i evaziga taklif qilib kelgan.
Buxoro viloyati Ichki ishlar boshqarmasi Tezkor-qidiruv xizmati xodimlari tomonidan o‘tkazilgan navbatdagi tezkor tadbir davomida 21 yoshli fuqaroning moddiy manfaat orttirish maqsadida qonunga xilof faoliyat yuritib kelayotgani aniqlangan.
Ma’lum bo‘lishicha, u Telegram messenjerida maxsus kanal tashkil etib, unda ayollarning suratlarini joylashtirgan hamda ularning xizmatlarini soatbay va tunbay ko‘rinishda muayyan pul mablag‘i evaziga taklif qilib kelgan.
Joriy yilning 12-fevral kuni soat taxminan 15:00 larda u Buxoro shahridagi xonadonlardan birida mijozga jinsiy aloqa uchun o‘zining Telegram guruhidagi ayollardan birini 400 ming so‘m evaziga gaplashib bergan. Ushbu xizmat uchun vositachi sifatida 100 ming so‘m miqdorida haq talab qilgan.
Tezkor tadbir davomida u 100 ming so‘m miqdoridagi pul mablag‘ini olayotgan vaqtida ashyoviy dalillar bilan qo‘lga olingan.
Mazkur holat yuzasidan gumonlanuvchiga nisbatan O‘zbekiston Respublikasi Jinoyat kodeksining 131-moddasi 1-qismi bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.
