Epshteyn ishida Trampni ayblagan ayolning ko‘rsatmalari e’lon qilindi
AQSH Adliya vazirligi moliyachi va jinsiy jinoyatchi Jeffri Epshteyn ishi bo‘yicha ilgari e’lon qilinmagan Federal qidiruv byurosi hujjatlarini oshkor qildi.
Epshteyn ishi bo'yicha yaqinda ochiqlangan hujjatlarda bir ayolning Donald Trampni jinsiy jinoyatlarda ayblagan bayonotlari ham o‘rin olgan. Bu haqda Reuters xabar berdi.
Agentlik xabariga ko‘ra, hujjatlar 5-mart kuni vazirlik rasmiy saytida e’lon qilingan. Federal qidiruv byurosi materialida 2019-yilda tergovchilar nomi oshkor qilinmagan ayolni Epshteyn ishi yuzasidan to‘rt marta so‘roq qilgani keltirilgan.
Avval Adliya vazirligi faqat bitta uchrashuv haqida qisqacha ma’lumot bergan edi. O‘sha uchrashuvda ayol Epshteyn unga o‘smirlik paytida tegajog‘lik qilganini aytgandi.
Yangi hujjatlarda ayol 1980-yillarda, ya’ni 13–15 yoshda bo‘lganida Epshteyn uni Tramp bilan tanishtirganini va Tramp uni g‘ayriinsoniy jinsiy aloqa qilishga majburlashga uringanini bildirgan. Reuters bu da’volarni mustaqil ravishda tasdiqlay olmagan.
Oq uy matbuot kotibi esa ushbu ayblovlarni “mutlaqo asossiz va hech qanday ishonchli dalillar bilan tasdiqlanmagan” deb atadi. Adliya vazirligi ham e’lon qilingan materiallarning bir qismida Trampga nisbatan “ishonchsiz va shov-shuvli da’volar” bo‘lishi mumkinligini ogohlantirgan. Hujjatlar ilgari “takroriy fayllar” deb belgilangan 15 ta hujjat orasida bo‘lganligi sababli e’lon qilinmagani aytilgan.
Epshteyn ishi bilan bog‘liq mazkur hujjatlar Kongress bosimi fonida jamoatchilikka oshkor qilinmoqda. Demokratlar Tramp ma’muriyatini prezidentga aloqador materiallarni yashirishda ayblamoqda.
Xususan, CNN telekanali Epshteyn ishi bo‘yicha keyingi e’lon qilingan hujjatlarda ayrim tergov ma’lumotlari “yo‘qolganini” bildirgan edi.
AQSH ommaviy axborot vositalari anonim da’vogar ayolning fuqarolik sudlariga bir necha bor da’vo arizasi berganini xabar qilgan. U o‘smir paytida Tramp va Epshteyn uning nisbatan jinsiy jinoyatlar sodir etganini iddao qilgan, ammo da’volar keyinchalik qaytarilgan va sudda ko‘rib chiqilmagan.
2008-yilda Jeffri Epshteyn voyaga yetmagan shaxsni fohishalikka undashda sudlangan, 2019-yilda esa ayollar, jumladan, voyaga yetmaganlar savdosi va fohishalikka undashda ayblangan. Shu yili u qamoqxona kamerasida vafot etgan, uning sherigi Gisleyn Maksvell esa keyinchalik 20 yillik qamoq jazosiga hukm qilingan.
