O‘zbekiston va Tojikiston madaniyat arboblari “Do‘stlik” ordeni bilan taqdirlandi
Mukofotlarni ikki davlat madaniyat vazirlari tantanali ravishda topshirdi.
O‘zbekiston va Tojikiston o‘rtasidagi madaniy hamkorlikni mustahkamlashga qo‘shgan munosib hissasi uchun ikki mamlakatning bir guruh madaniyat va san’at sohasi vakillari davlat mukofotlari bilan taqdirlandi.
O‘zbekiston Prezidentining tegishli farmoniga muvofiq, Tojikiston Respublikasining So‘g‘d viloyatidagi “Nuri niyogon” shashmaqom ansambli rahbari Shuhratjon Nabiyev O‘zbekiston Respublikasining “Do‘stlik” ordeni bilan mukofotlandi.
Shuningdek, Tojikiston Prezidentining farmoniga asosan, O‘zbekistondagi Tojik milliy madaniy markazi rahbari Gulandom Subxonova Tojikiston Respublikasining “Do‘stlik” ordeni bilan taqdirlandi.
Davlat mukofotlarini tantanali ravishda O‘zbekiston madaniyat vaziri Ozodbek Nazarbekov hamda Tojikiston madaniyat vaziri Matlubaxon Sattoriyon topshirdi.
Ma’lumot uchun, 2024-yilda Tojikistonda o‘tkazilgan “O‘zbekiston madaniyati kunlari” doirasida ham ikki mamlakatning bir guruh madaniyat va san’at arboblari yuksak faxriy unvonlar bilan taqdirlangan edi.
Ta’kidlash joizki, O‘zbekiston Prezidenti Shavkat Mirziyoyevning taklifiga binoan Tojikiston Prezidenti Emomali Rahmon 26–27 mart kunlari davlat tashrifi bilan O‘zbekistonda bo‘ldi.
Tashrif doirasida oliy darajadagi muzokaralar hamda ikki davlat yetakchilari raisligida Oliy davlatlararo kengashning birinchi yig‘ilishi o‘tkazildi. Unda O‘zbekiston va Tojikiston o‘rtasidagi do‘stlik, yaxshi qo‘shnichilik, strategik sheriklik hamda ittifoqchilik munosabatlarini yanada rivojlantirish masalalari muhokama qilindi.
Ayni kunlarda mamlakatimizda “Tojikiston madaniyati va kinosi kunlari” tadbirlari ham bo‘lib o‘tmoqda. Mazkur madaniy tadbirlar 29-mart kuniga qadar davom etadi.