O‘zbek ohanglari London sahnalarida: yangi musiqiy hamkorlikka start berildi
O‘zbekiston va Buyuk Britaniya musiqa sanʼati, taʼlimi va industriyasi sohalarida hamkorlikni yangi bosqichga olib chiqish bo‘yicha kelishuvlarga erishdi.
Londonda O‘zbekiston Madaniyat vaziri Ozodbek Nazarbekov Buyuk Britaniya Musiqa industriyasi uyushmasi (UK Music) rahbari Tom Kiehl bilan uchrashib, ikki mamlakat o‘rtasidagi madaniy aloqalarni, xususan, musiqa sohasidagi hamkorlikni kengaytirish masalalarini muhokama qildi. Uchrashuvda O‘zbekistonning Buyuk Britaniyadagi Favqulodda va Muxtor Elchisi Ravshan Usmonov ham ishtirok etdi.
Muloqot davomida Britaniyaning musiqa bozorini boshqarish, ovoz yozish sanoati va zamonaviy musiqa menejmenti bo‘yicha ilg‘or tajribasini O‘zbekistonda joriy etish masalalari muhokama qilindi. Shuningdek, yosh isteʼdodlarni qo‘llab-quvvatlash, musiqachilar, prodyuserlar va ovoz muhandislari uchun britan mutaxassislari ishtirokida trening hamda mahorat darslarini tashkil etish bo‘yicha fikr almashildi.
Musiqa industriyasini raqamlashtirish, mualliflik huquqini himoya qilish va striming platformalari bilan samarali ishlash bo‘yicha hamkorlikni kuchaytirish, shuningdek, ikki mamlakat ijodkorlari ishtirokida qo‘shma festivallar, gastrol safarlari va xalqaro musiqa loyihalarini amalga oshirish imkoniyatlari ko‘rib chiqildi.
Safar doirasida Ozodbek Nazarbekov Londondagi Royal College of Music (RCM) rahbari Kevin Porter bilan ham uchrashdi. Tomonlar oliy musiqa taʼlimini zamonaviy talablar asosida rivojlantirish, yosh isteʼdodlarni qo‘llab-quvvatlash hamda milliy va jahon mumtoz musiqasini xalqaro miqyosda targ‘ib qilish masalalarini muhokama qildi.
Muzokaralar yakunida O‘zbekiston Davlat konservatoriyasi va RCM o‘rtasida to‘g‘ridan-to‘g‘ri anglashuv memorandumini imzolash, talabalar hamda professor-o‘qituvchilar almashinuvini yo‘lga qo‘yish bo‘yicha kelishuvga erishildi.
Shuningdek, RCM professorlarini O‘zbekistondagi konservatoriya va ixtisoslashtirilgan musiqa maktab-internatlarida mahorat darslari o‘tkazish uchun jalb etish, o‘zbekistonlik yosh pedagoglarning Londonda malaka oshirishi va amaliyot o‘tashi uchun imkoniyat yaratish rejalashtirilmoqda.
Iqtidorli yosh musiqachilarga RCMning bakalavriat va magistratura dasturlarida “El-yurt umidi” jamg‘armasi hamda maxsus grantlar asosida tahsil olish imkoniyatlarini yaratish bo‘yicha hamkorlik qilishga ham kelishildi.
Ijodiy yo‘nalishda esa RCM orkestri va bastakorlari bilan hamkorlikda o‘zbek milliy cholg‘ulari hamda maqom sanʼati asosida simfonik asarlar yaratish, shuningdek, London sahnalarida qo‘shma konsertlar tashkil etish rejalashtirilmoqda.
Madaniyat vaziri Ozodbek Nazarbekovning qayd etilishicha, mazkur kelishuvlar O‘zbekistonda musiqa taʼlimiga ilg‘or xalqaro tajriba va standartlarni joriy etish, yosh musiqachilarning kasbiy salohiyatini oshirish hamda milliy musiqa sanʼatini xalqaro maydonda keng targ‘ib qilishga xizmat qiladi.
