Ganjada O‘zbekiston va Ozarbayjon san’atkorlari ishtirokida “Do‘stlik” konserti bo‘lib o‘tdi

Ozarbayjon Respublikasi Madaniyat vazirligi hamda Ozarbayjon Respublikasining O‘zbekiston Respublikasidagi Elchixonasi huzuridagi Haydar Aliyev nomidagi Ozarbayjon Madaniyat Markazi tashabbusi bilan “Ozarbayjon madaniyatining yozgi maktabi” loyihasi amalga oshirilmoqda. Loyiha doirasida O‘zbekistondagi Haydar Aliyev nomidagi Ozarbayjon Madaniyat Markazi, Ganja-Dashkasan mintaqaviy madaniyat boshqarmasi hamda Fikrat Amirov nomidagi Ganja davlat filarmoniyasi hamkorligida filarmoniyaning yozgi zalida “Do‘stlik” nomli konsert dasturi taqdim etildi.

 

 

Ozarbayjon va O‘zbekiston san’atkorlarining birgalikdagi chiqishlari namoyish etilgan madaniy tadbirda davlat va san’at arboblari, ilm-fan va madaniyat namoyandalari, talabalar, ommaviy axborot vositalari vakillari hamda mahalliy aholi ishtirok etdi.

 

Tadbirning ochilishida so‘zga chiqqan O‘zbekistondagi Haydar Aliyev nomidagi Ozarbayjon Madaniyat Markazi direktori Akif Marifli loyiha Ozarbayjon va O‘zbekiston xalqlari o‘rtasidagi madaniy muloqotni yanada kengaytirish nuqtai nazaridan muhim ahamiyat kasb etishini ta’kidladi. 

 

 

U bunday tashabbuslar ikki qardosh xalqning boy madaniy merosini o‘zaro targ‘ib etishga, ayniqsa, Ozarbayjon va O‘zbekiston yoshlari o‘rtasidagi madaniy, gumanitar va do‘stlik aloqalarini yanada mustahkamlashga xizmat qilishini qayd etdi.

 

Shuningdek, u ikki xalq o‘rtasidagi do‘stlik munosabatlarini mustahkamlash hamda strategik sheriklikni yanada yuqori darajaga olib chiqish yo‘lida ko‘rsatayotgan alohida e’tibor va siyosiy iroda uchun Ozarbayjon Respublikasi Prezidenti janob Ilhom Aliyev hamda O‘zbekiston Respublikasi Prezidenti janob Shavkat Mirziyoyevga minnatdorlik bildirdi.

 

 

Ozarbayjonning Xalq artisti, Fikrat Amirov nomidagi Ganja davlat filarmoniyasi direktori Aygun Samadzoda hamda Ozarbayjon Milliy fanlar akademiyasi Ganja bo‘limi raisining ilmiy ishlar va raqamli rivojlanish bo‘yicha o‘rinbosari, dotsent Alimuxtar Muxtarov o‘z chiqishlarida Ozarbayjon va O‘zbekiston xalqlari o‘rtasidagi munosabatlar umumiy tarixiy ildizlar, boy madaniy meros, milliy-ma’naviy qadriyatlar va qadimiy musiqa an’analariga asoslanganini ta’kidladilar. 

 

 

Qayd etildiki, bunday madaniy loyihalar yosh avlodning milliy merosga sadoqatini mustahkamlash, xalqlarimiz o‘rtasidagi tarixiy-madaniy aloqalarni kelajak avlodlarga yetkazish, shuningdek, ikki mamlakatning ilm-fan, madaniyat va san’at namoyandalari o‘rtasidagi hamkorlikni yanada kengaytirishga muhim hissa qo‘shadi.

 

Shundan so‘ng tadbir rang-barang musiqiy-badiiy dastur bilan davom etdi. Konsertda O‘zbekistondagi Haydar Aliyev nomidagi Ozarbayjon Madaniyat Markazining “Xarıbülbül” teatr truppasi a’zolari hamda Fikrat Amirov nomidagi Ganja davlat filarmoniyasi solistlari Ozarbayjon va O‘zbekiston madaniyatining boy musiqa va raqs namunalarini namoyish etdilar.

 

Umuman olganda, konsert dasturi Ozarbayjon va O‘zbekiston yoshlari o‘rtasidagi ijodiy aloqalarni kengaytirish, ikki qardosh xalq madaniyatini o‘zaro targ‘ib etish hamda do‘stlik munosabatlarini yanada mustahkamlashga hissa qo‘shgan madaniy voqea sifatida baholandi.