O‘zbekiston va Gretsiya 2026–2028 yillarga mo‘ljallangan madaniy hamkorlik dasturini imzoladi
Iskandar Makedonskiy va Roksana tarixiga bag‘ishlangan qo‘shma badiiy film yaratish tashabbusi ilgari surildi.
O‘zbekiston Respublikasi Madaniyat vaziri Ozodbek Nazarbekov xizmat safari doirasida Gretsiyada bo‘lib, Gretsiya madaniyat vaziri Lina Mendoni bilan muzokaralar o‘tkazdi.
Afina shahrida bo‘lib o‘tgan uchrashuv yakunida O‘zbekiston va Gretsiya hukumatlari o‘rtasida 2026–2028 yillarga mo‘ljallangan Madaniy hamkorlik dasturi imzolandi. Tomonlar hujjat ikki davlat o‘rtasidagi madaniy-gumanitar aloqalarni tizimli rivojlantirish, tajriba almashish va qo‘shma loyihalarni amalga oshirish uchun huquqiy asos bo‘lib xizmat qilishini ta’kidladi.
Muzokaralarda hamkorlik dasturining amaliy ijrosini ta’minlash maqsadida qo‘shma “Yo‘l xaritasi”ni ishlab chiqishga kelishib olindi. Unda amalga oshiriladigan tadbirlar, muddatlar va mas’ul tashkilotlar belgilanadi.
Shuningdek, tomonlar Gretsiyada “O‘zbekiston madaniyati haftaligi” va O‘zbekistonda “Gretsiya madaniyati haftaligi”ni muntazam o‘tkazish tashabbusini qo‘llab-quvvatladi. Ushbu tadbirlar doirasida konsertlar, teatr tomoshalari, ko‘rgazmalar, kino kunlari, hunarmandchilik va milliy taomlar taqdimotlarini tashkil etish rejalashtirilgan.
Uchrashuvda muzeylar o‘rtasidagi strategik sheriklikni rivojlantirish, tarixiy-madaniy merosni asrash, qo‘shma ko‘rgazmalar va restavratsiya loyihalarini amalga oshirish masalalari ham muhokama qilindi.
Bundan tashqari, O‘zbekiston va Gretsiya olimlari ishtirokida qo‘shma arxeologik ekspeditsiyalarni tashkil etish, shuningdek, Iskandar Makedonskiy va Roksana tarixiga bag‘ishlangan qo‘shma badiiy film yaratish tashabbusi ilgari surildi.
Tomonlar yosh ijodkorlar, dizaynerlar, musiqachilar va san’at vakillari uchun almashinuv dasturlarini yo‘lga qo‘yish hamda kreativ industriyalar sohasida yangi qo‘shma loyihalarni amalga oshirish yuzasidan ham fikr almashdi.
Uchrashuv yakunida ikki mamlakat vakillari imzolangan hamkorlik dasturi O‘zbekiston va Gretsiya o‘rtasidagi madaniyat, san’at, ilm-fan va kreativ sohalardagi uzoq muddatli strategik sheriklikni yanada mustahkamlashiga ishonch bildirdi.
