Toshkentda madaniyat va san’at sohasidagi islohotlar muhokama qilinib, yangi rahbarlar tayinlandi
Yig‘ilishda sohadagi kamchiliklar tanqid qilinib, yil yakuniga qadar namunali ko‘rsatkichlarga erishish vazifasi belgilandi.
Toshkentda madaniyat va san’at sohasidagi islohotlarning ijrosi muhokama qilinib, poytaxt madaniyat boshqarmasiga yangi rahbarlar tayinlandi.
21-avgust kuni madaniyat vaziri Ozodbek Nazarbekov Toshkent shahrida sohada amalga oshirilayotgan ishlar, islohotlarning ijrosi hamda kelgusidagi ustuvor vazifalarga bag‘ishlangan yig‘ilish o‘tkazdi.
Unda Toshkent shahar hokimining turizm, madaniyat, madaniy meros va ommaviy kommunikatsiyalar masalalari bo‘yicha o‘rinbosari Azizxon Shovkatov, Madaniyat vazirligi markaziy apparati rahbarlari hamda poytaxtdagi madaniyat va san’at sohasi mas’ullari ishtirok etdi.
Yig‘ilishda madaniyat markazlari faoliyatini transformatsiya qilish, sohaga tadbirkorlarni jalb etish uchun imtiyozlar joriy etish, madaniyat, san’at va adabiyot yo‘nalishlarida 21 ta ijodiy birlashma tashkil etish kabi ishlar amalga oshirilayotgani qayd etildi.
Shuningdek, bolalar musiqa maktablari o‘qituvchilarining ish haqi umumta’lim maktablari o‘qituvchilari maoshiga tenglashtirilgani, 16 ta ixtisoslashtirilgan maktab-internat va 3 ta oliy maktab tashkil etilgani ta’kidlandi. Ijodkor yoshlar va ustozlarni moliyaviy rag‘batlantirish, uy-joy, ijara haqi, davolanish hamda tibbiy sug‘urta bo‘yicha qator imtiyozlar belgilangan.
Vazir Toshkent shahrida amalga oshirilayotgan islohotlar va ularning ijrosi yetarli darajada emasligini tanqid qildi. U soha xodimlari 2026-yil 21-apreldagi 150-son qaror va 2-iyundagi 103-son Farmonda belgilangan vazifalarni chuqur o‘zlashtirib, ularni amaliyotga samarali tatbiq etishi zarurligini ta’kidladi.
Yig‘ilishda kadrlar masalasi ham ko‘rib chiqildi.
Bekzod Baxromov Toshkent shahar madaniyat boshqarmasi boshlig‘i etib tayinlandi. U bungacha mazkur boshqarmada rahbar o‘rinbosari lavozimida faoliyat yuritgan.
Shukurillo Isroilov esa Toshkent shahar madaniyat boshqarmasi boshlig‘i o‘rinbosari lavozimiga tayinlandi. U tayinlovga qadar “O‘zbekkonsert” davlat muassasasida badiiy so‘z ustasi bo‘lib ishlagan.
Yig‘ilish yakunida Toshkent shahri yil oxirigacha madaniyat va san’at sohasining barcha yo‘nalishlarida namunali ko‘rsatkichlarga erishishi lozimligi ta’kidlandi. Yangi tayinlangan rahbarlar zimmasiga islohotlarni samarali amalga oshirish, mavjud kamchiliklarni bartaraf etish va belgilangan vazifalar ijrosini ta’minlash bo‘yicha vazifalar yuklatildi.
