Toshkentda Tracker’da odamlarni qasddan urib ketgan haydovchiga jinoyat ishi qo‘zg‘atildi
Hozirda holat yuzasidan jinoyat ishi ochilib, tergov harakatlari olib borilmoqda.
Toshkent shahri Yunusobod tumanida 26-mart kuni Tracker haydovchisi bir guruh odamlarni qasddan urib yuborgani yuzasidan jinoyat ishi qo‘zg‘atildi. Bu haqda poytaxt IIBB axborot xizmati xabar berdi.
Ma’lum qilinishicha, ijtimoiy tarmoqlarda tarqalgan video yuzasidan o‘rganish ishlari olib borilgan. Hodisa tumandagi Niyozbek yo‘li va Xalqobod ko‘chalari kesishgan chorrahada sodir bo‘lgan. Voqea joyiga yetib borilganida, fuqarolar o‘rtasida kelishmovchilik oqibatida janjal yuzaga kelgani aniqlangan.
Janjal yakunlanish arafasida bo‘lgan paytda Tracker haydovchisi harakatlanib kelib, to‘rt nafar fuqaroni urib yuborgan. Hodisa joyidan zarur daliliy ashyolar rasmiylashtirib olingan.
Mazkur holat yuzasidan tuman prokuraturasi tomonidan Jinoyat kodeksining 25-moddasi orqali 97-moddasi (qasddan odam o‘ldirishga urinish) hamda 277-moddasi (bezorilik) bilan jinoyat ishi qo‘zg‘atilgan. Hozirda tergov harakatlari olib borilmoqda.
Avvalroq Samarqandda voyaga yetmagan yigit 5 yoshli qizchani mashinada urib, qochib ketgani haqida xabar berilgandi.
