AQSh o‘zining minglab desantchilarini Yaqin Sharqqa joylashtirmoqda
Harbiylar Eronning neft eksporti uchun muhim bo‘lgan Xarg orolini egallash uchun safarbar qilinishi mumkin.
AQSh armiyasining elita 82-havo-desant diviziyasiga qarashli minglab harbiylar Yaqin Sharqqa yetib kelishni boshladi. Bu haqda Reuters ikki amerikalik rasmiy manbaga tayanib xabar berdi.
Qayd etilishicha, bu voqea AQSh prezidenti Donald Tramp Eron bilan urush bo‘yicha keyingi qadamlarini ko‘rib chiqayotgan bir paytda ro‘y bermoqda.
Shimoliy Karolina shtatining Fort-Bregg shahrida joylashgan parashyutchilar mintaqaga yuborilgan minglab qo‘shimcha dengizchilar, dengiz piyodalari va maxsus operatsiya kuchlariga qo‘shilishadi. Dam olish kunlari Yaqin Sharqqa taxminan 2500 dengiz piyodasi yetib keldi.
Anonim manbalar jurnalistlarga qo‘shinlarning aniq qayerda joylashtirilishi hozircha ma’lum qilinmaganini bildirgan.
“Qo‘shimcha kuchlar 82-havo-desant diviziyasining shtab bo‘linmalari, ba’zi logistika va boshqa yordamchi bo‘linmalar hamda bitta jangovar brigadani o‘z ichiga oladi. Eron tomoniga qo‘shin yuborish bo‘yicha yakuniy qaror hozircha qabul qilinmagan, ammo ular mintaqadagi kelajakdagi operatsiyalar uchun quvvatni oshiradi”, — deya Reuters bir rasmiyning so‘zlarini keltirgan.
Ma’lum qilinishicha, harbiylar Eron bilan urushda bir nechta maqsadda, xususan, Eron neft eksportining 90 foizi to‘g‘ri keladigan Xarg orolini egallab olish uchun safarbar etilishi mumkinligi qayd etilmoqda.
“AQSh quruqlik qo‘shinlarining har qanday qo‘llanilishi Donald Tramp uchun jiddiy siyosiy risklarni yuzaga keltirishi mumkin, chunki AQSh jamoatchiligi Eronga qarshi urushni qo‘llab-quvvatlamaydi va prezidentning saylovoldi va’dalari AQShni Yaqin Sharqdagi yangi mojarolarga jalb qilmaslikni nazarda tutgan edi”, deyiladi xabarda.
