Toshkentda 2 nafar bozor qorovuli itlar ustiga mashina haydadi
Holat yuzasidan rasmiy ma’lumot berildi.
Ijtimoiy tarmoqlarda 2 nafar fuqaro avtomashinalarida kuchuklarni ustiga haydayotganliklari aks etgan video tarqaldi. Mazkur holat yuzasidan Toshkent shahar IIBB ma’lumot berdi.
Ma’lum qilinishicha, 5-aprel kuni taxminan soat 23.00 larda Uchtepa tumanidagi bozorlarning birida qorovul bo‘lib ishlovchi 1997-yilda tug‘ilgan T.M. va 1996-yilda tug‘ilgan M.D. lar o‘zlarining avtomashinalarini kuchuklar ustiga haydagan.
Mazkur holat yuzasidan Uchtepa tumani IIO FMB tomonidan O‘zbekiston Respublikasi Ma’muriy javobgarlik to‘g‘risidagi kodeksining 111-moddasi (“Hayvonlarga nisbatan shafqatsiz munosabatda bo‘lish”) alomatlari bilan ma’muriy bayonnoma rasmiylashtirilgan.
To‘plangan hujjatlar qonuniy chora ko‘rish uchun Jinoyat ishlari bo‘yicha tuman sudiga yuborilgan.
Avvalroq O‘zbekiston Ekologik partiyasi hayvonlarga nisbatan shafqatsizlik uchun javobgarlikni keskin kuchaytirishni nazarda tutuvchi qonun loyihasini tayyorlayotgani haqida xabar bergandik.
Taklif etilayotgan yangi qonun loyihasida esa jazo choralarini yanada kuchaytirish ko‘zda tutilgan. Xususan, hayvonlarga nisbatan shafqatsizlik uchun jarimalarni 200 BHMgacha (80 mln so‘mdan ortiq) oshirish hamda bir yilgacha ozodlikdan mahrum qilish jazosini joriy etish taklif qilinmoqda.
