Andijon, Namangan va Farg‘onada mansabdorlar pora bilan ushlandi
Andijon viloyati hokimi o‘rinbosarining pora olgani tasdiqlandi.
Andijon, Namangan va Farg‘ona viloyatlarida bir nechta korrupsion holatlar aniqlanib, mansabdor shaxslar ashyoviy dalillar bilan ushlandi. Bu haqda Zamon.uz'ga DXX xabar berdi.
Avvalroq Andijondagi holatda viloyat hokimi o‘rinbosari Isomiddin Ismanov pora bilan qo‘lga olingani haqida xabar berilgandi. DXX tomonidan o‘tkazilgan tezkor tadbir tasvirlari e’lon qilindi.
Ma’lum bo‘lishicha, Isomiddin Ismanov o‘z xizmat mavqeidan foydalanib, tadbirkordan 20 sotix davlat zaxirasidagi yer maydonini rasmiylashtirib berish va qurilish ishlari uchun ruxsatnoma olish evaziga 50 ming AQSH dollarini talab qilgan. Davlat xavfsizlik xizmati xodimlari tomonidan o‘tkazilgan tezkor tadbirda mansabdor shaxs o‘z yashash xonadonida pulni olayotgan vaqtda ushlangan.
Shuningdek, Namanganda tuman qurilish bo‘limi bosh arxitektori, mahalliy oilaviy korxonaga tegishli avtomobillar yuvish shoxobchasining loyiha hujjatlarini rasmiylashtirib berish va tasarruf qilish bo‘yicha taqiqni bekor qilish evaziga 1500 AQSH dollarini talab qilgani aniqlangan. Tezkor tadbirda bosh arxitektor 1000 dollarni tamagirlik yo‘li bilan olgan vaqtida ushlangan.
Ma’lumotlarga ko‘ra, korxona rahbari ilgari sud tomonidan 43,3 mln so‘m jarima to‘lagan, ammo bosh arxitektor unga qonuniy yechim ko‘rsatmasdan, pora talab qilgan.
Farg‘ona viloyati Qo‘shtepa tumanidagi Bandlikka ko‘maklashish bo‘limi boshlig‘i o‘rinbosari esa o‘z xizmat mavqeidan foydalangan holda, mahalliy fuqaroning ishonganini ishlatib, uni Andijon viloyatidagi oliy ta’lim muassasasiga kirish evaziga 2000 AQSH dollarini olgan. Ushu mansabdor ham Davlat xavfsizlik xizmati va Iqtisodiy jinoyatlarga qarshi kurashish departamenti tomonidan ushlangan.
Hozirda har uchala holat yuzasidan qonunbuzarlarga nisbatan Jinoyat Kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
