Denovda gaz zapravkada portlash sodir bo'ldi
Holat yuzasidan rasmiy ma’lumot berildi.
Surxondaryo viloyati Denov tumanidagi gaz zapravkada yong'in yuzaga keldi. Bu haqda FVV xabar berdi.
Ma’lum qilinishicha, 7-aprel kuni soat 08:24 da “112” tizimidan Surxondaryo viloyati FVBga Denov tumani, “Oqtom” MFYda joylashgan avtomobillarga suyultirilgan gaz quyish shoxobchasida yong‘in kelib tushgani haqida xabar kelib tushgan.
Shoxobchadagi yong‘in “KAMAZ” rusumli suyultirilgan (propan) gaz tashuvchi maxsus avtomobildan sig‘imga gazini quyish vaqtida chaqnash sodir bo‘lgani natijasida yuzaga kelgan.
Hodisa joyiga 5 ta qutqaruv bo‘linmalari soat 08:39 da yetib borib, yong‘in soat 08:42 da o‘rab olingan va hozirda yong‘inni bartaraf etish ishlari davom ettirilmoqda.
Dastlabki ma’lumotga ko‘ra, sig‘imning yorilishi sababi maxsus avtomobildan propan gazini bo‘shatish vaqtida texnologik jarayonning buzilishi deb taxmin qilinmoqda.
Voqea joyiga viloyat FVB rahbar xodimlari, Denov tumani IIB, SSB, “Hududgazta’minot” rahbar va xodimlari chiqishgan hamda hodisaning kelib chiqish sabablarini aniqlash ishlari olib borilmoqda.
Vaziyat to‘liq nazoratga olingan.
