“Quyoshli xonadon” dasturi: fuqarolarga 642 mlrd so‘mdan ortiq subsidiya to‘landi
Eng ko‘p mablag‘ Buxoro va Xorazm viloyatlariga to‘g‘ri kelgan.
2026-yilning yanvar–sentabr oylarida “Quyoshli xonadon” dasturi doirasida 70,7 ming nafar fuqaroga davlat budjetidan 642 mlrd 112,1 mln so‘m subsidiya ajratildi. Bu haqda Soliq qo‘mitasi xabar berdi.
Ma’lum qilinishicha, mablag‘lar xonadonlariga quyosh panellarini o‘rnatib, ishlab chiqarilgan elektr energiyasini yagona elektr energetika tizimiga uzatgan fuqarolarga to‘langan.
Subsidiyaning eng katta qismi quyidagi hududlar hissasiga to‘g‘ri kelgan:
-
Buxoro viloyati — 116,7 mlrd so‘m;
-
Xorazm viloyati — 115,3 mlrd so‘m;
-
Qashqadaryo viloyati — 72,6 mlrd so‘m.
Fuqarolar to‘plangan subsidiyani “Soliq” mobil ilovasidagi “Keshbek va imtiyozlar” xizmatining “Quyoshli xonadon” bo‘limi orqali bank kartasiga o‘tkazib olishlari mumkin.
Eslatib o‘tamiz, 2023-yil 1-apreldan boshlab “Quyoshli xonadon” dasturi doirasida xonadoniga quyosh panellarini o‘rnatgan jismoniy shaxslarga tarmoqqa uzatilgan elektr energiyasining har bir kilovatt-soati uchun 1 000 so‘mdan subsidiya berish belgilangan.
