Vashingtonda Amerika–O‘zbekiston ishbilarmonlik kengashi ish boshladi
Saida Mirziyoyeva Serjio Gor bilan anglashuv memorandumini imzoladi.
Prezident administratsiyasi rahbari Saida Mirziyoyeva Amerika–O‘zbekiston ishbilarmonlik va investitsiya kengashi hamraisi, elchi Serjio Gor bilan Vashingtonda uchrashuv o‘tkazdi. Bu haqda u o‘zining Telegram sahifasida ma’lum qildi.
Ma’lum qilinishicha, uchrashuv Amerika–O‘zbekiston ishbilarmonlik va investitsiya kengashi faoliyati rasman boshlanishi arafasida bo‘lib o‘tgan. Tomonlar O‘zbekiston va AQSH o‘rtasidagi ishbilarmonlik hamkorligining asosiy yo‘nalishlarini muhokama qilgan.
“Ushbu tuzilma O‘zbekiston va Qo‘shma Shtatlar o‘rtasidagi biznes aloqalarni yanada mustahkamlashga xizmat qiladigan samarali maydonga aylanishi shubhasiz. Bunga mamlakatlarimiz Prezidentlarining qat’iy siyosiy irodasi mustahkam zamin yaratmoqda”, — degan Saida Mirziyoyeva.
Shuningdek, uchrashuv yakunida o‘zaro anglashuv memorandumi imzolandi.
Avvalroq Prezident administratsiyasi rahbari 6-aprel kuni Serjio Gor bilan Mar-a-Lagoda ham uchrashgan edi.
