Buxoroda Ko‘kdala tajribasi asosida yangi boshqaruv markazi shakllantirilmoqda
Yangi ma’muriy markazda davlat idoralari bir joyga jamlanib, fuqarolar uchun qulay xizmat tizimi yaratiladi.
Prezident Shavkat Mirziyoyev Buxoro shahriga tashrifi doirasida viloyatning yangi ma’muriy markazida amalga oshirilayotgan bunyodkorlik ishlari bilan tanishdi.
Mazkur majmua davlat boshqaruvini aholiga yanada yaqinlashtirish, xizmatlar sifatini oshirish hamda fuqarolar uchun qulay muhit yaratishga qaratilgan yangi yondashuvning amaliy ifodasidir. Ushbu tizim avval Qashqadaryo viloyatining Ko‘kdala tumanida sinovdan muvaffaqiyatli o‘tgan tajriba asosida shakllantirilmoqda.
U yerda 38 ta davlat idorasining bir hududda jamlanishi fuqarolar uchun katta qulaylik yaratib, ortiqcha vaqt va masofa sarfini kamaytirgan edi. Endilikda ushbu yondashuv boshqa hududlarda ham keng joriy etilmoqda.
Buxorodagi yangi ma’muriy markaz 14 gektar maydonda barpo etilmoqda. Birinchi bosqichda viloyat va shahar hokimliklari, prokuratura hamda ichki ishlar boshqarmasi kabi asosiy idoralar bir joyga jamlangan. Bu esa davlat organlari o‘rtasidagi muvofiqlashuvni kuchaytirish, murojaatlar bilan ishlash samaradorligini oshirish va xizmatlar sifatini yaxshilashga xizmat qiladi.
Majmua faqat ma’muriy binolardan iborat emas — bu yerda fuqarolar uchun xiyobonlar, yashil hududlar va favvoralar ham barpo etilib, aholining dam olishi uchun qulay sharoit yaratilmoqda.
Tashrif davomida hududni ijtimoiy-iqtisodiy rivojlantirish bo‘yicha taqdimot ham o‘tkazildi. Unda banklar tomonidan sun’iy intellekt asosida hudud va mahallalar kesimida tahlillar olib borilgani, natijada Buxoro tumanida agrobiznes, turizm, sanoat va servis sohalari ustuvor yo‘nalishlar sifatida belgilanganligi ma’lum qilindi.
Shuningdek, 15 ming gektar yerni o‘zlashtirish, 500 gektar uzumzorlar barpo etish, enoturizmni rivojlantirish hamda neft-gaz, kimyo va oziq-ovqat sanoatida yangi loyihalarni amalga oshirish rejalashtirilgan. Hisob-kitoblarga ko‘ra, 2026–2031 yillarda ushbu yo‘nalishlarda 7,4 trillion so‘mlik investitsiyalar jalb qilinib, 15 mingdan ortiq ish o‘rinlari yaratilishi mumkin.
Tuman darajasida 36 ta mahalla 6 ta asosiy drayver yo‘nalishga ixtisoslashtirilishi ko‘zda tutilgan. Loyihalarni boshqarish va monitoring qilishda sun’iy intellekt texnologiyalaridan foydalanish, resurslarni samarali taqsimlash va natijadorlikni oshirish rejalashtirilgan.
Davlat rahbari sun’iy intellekt asosida hudud salohiyatini to‘liq ishga solish, loyihalarni aniq natijaga yo‘naltirish va aholi daromadini oshirishga xizmat qiluvchi tashabbuslarni qo‘llab-quvvatlash zarurligini ta’kidladi.
