Chirchiqda vagon ustiga chiqqan o‘smirni tok urdi
U vagon ustida selfi tushmoqchi bo‘lgan.
Toshkent viloyatining Chirchiq shahrida 17 yoshli o‘smirni poyezd vagoni ustida tok urib, u og‘ir ahvolda shifoxonaga yotqizildi. Bu haqda “Millar” ko‘rsatuvida xabar berildi.
Ma’lum qilinishicha, hodisa 1-aprel kuni Bo‘zsuv temiryo‘l stansiyasida yuz bergan. 2009-yilda tug‘ilgan yigit do‘stlari bilan birga Bo‘zsuv temiryo‘l stansiyasida turgan vagonlardan birining ustiga chiqib, selfi tushmoqchi bo‘lgan. Shu payt elektr tarmog‘idagi yuqori kuchlanish sabab yigitni tok urgan.
Shifokorlarning qayd etishicha, kuchlanishdan yuzaga kelgan elektr yoyi alangasi oqibatida o‘smir og‘ir kuyish jarohatini olib, yerga yiqilgan. Tekshiruvlarda yigit tanasining qariyb 80–85 foizi kuygani aniqlanib, u reanimatsiya bo‘limiga joylashtirilgan.
Shifokorlar uning ahvoli o‘ta og‘ir ekanini bildirib, bemorga intensiv davolash muolajalari olib borilayotganini va holat doimiy nazorat ostida ekanini ma’lum qildi.
