Islomobodda Eron–AQSh muzokaralarining bir bosqichi yakunlandi

Pokiston vositachiligida Islomobodda Eron va AQSh delegatsiyalari o‘rtasida o‘tkazilayotgan muzokaralarning bir bosqichi yakunlandi. Bu haqda Tasnim agentligi ma’lum qildi.

 

Ma'lum qilinishicha, yuzma-yuz muzokaralarning mazkur bosqichi yakunlangach, ikki davlat delegatsiyalari hozirda muhokama qilinayotgan masalalar yuzasidan yozma hujjatlar va takliflar almashish jarayoniga o‘tgan.

 

Ma’lumotlarga ko‘ra, shanba kuni bir necha soat davom etgan ekspert darajasidagi uchrashuvlarda Eron va AQSh delegatsiyalarining texnik guruhlari ishtirok etgan.

 

Muzokaralar davomida tomonlar kun tartibidagi masalalarni batafsil muhokama qilgan, bosqich yakunida esa o‘z pozitsiyalarini yozma shaklda almashishga kirishgan.

 

Shuningdek, xabarda qayd etilishicha, 28-fevral kuni Eron Islom inqilobi rahbari Oyatulloh Ali Xomanaiy va bir qator harbiy qo‘mondonlarga qilingan hujum hamda AQSh va Isroil tomonidan amalga oshirilgan keng ko‘lamli harbiy operatsiyadan so‘ng mintaqadagi vaziyat keskinlashgan. Bunga javoban Eron qurolli kuchlari mintaqadagi AQSh va Isroil pozitsiyalariga zarbalar bergani, bu esa tomonlar o‘rtasidagi qarama-qarshilikni yanada kuchaytirgani qayd etilgan.

Shu bilan birga, so‘nggi 40 kun davomida Eron tomonidan amalga oshirilgan qarshi hujumlar AQSh va Isroil harbiy obyektlariga sezilarli zarar yetkazgani, bu esa tomonlarning tezkor g‘alaba haqidagi kutgan natijalarini o‘zgartirgani ta’kidlanadi.

 

Keskinlikni yumshatish maqsadida Pokiston vositachiligida 8-aprel kuni ikki haftalik sulh bo‘yicha kelishuvga erishilgan bo‘lib, bu Islomobodda muzokaralar o‘tkazish uchun sharoit yaratgan.

 

Eron tomoni muzokaralar uchun o‘zining 10 banddan iborat rejasini ilgari surgan bo‘lib, unda AQSh qo‘shinlarining mintaqadan chiqishi, sanksiyalarning bekor qilinishi hamda strategik Hormuz bo‘g‘ozi ustidan nazorat masalalari o‘rin olgan.