O‘zbekiston musulmonlari idorasi fuqarolarni hajda firibgarlardan ehtiyot bo‘lishga chaqirdi
Noqonuniy yo‘llar bilan hajga borish qonunbuzarlik hisoblanib, deportatsiya va katta miqdordagi jarimalarga sabab bo‘lishi mumkin.
O‘zbekiston musulmonlari idorasi fuqarolarni haj safarini amalga oshirishda firibgarlar tuzog‘iga tushib qolmaslikka chaqirdi.
Idora ma’lumotiga ko‘ra, so‘nggi paytlarda ijtimoiy tarmoqlarda haj safariga oid asossiz va noqonuniy takliflar ko‘paygan. Natijada, o‘tgan yili yuzlab o‘zbekistonliklar norasmiy yo‘llar orqali hajga borib, ibodatlarini to‘liq ado eta olmagan.
Qayd etilishicha, ayrim holatlarda fuqarolar deportatsiya qilingan, jarimaga tortilgan, hatto jiddiy oqibatlar kuzatilgan.
Ta’kidlanishicha, Din ishlari bo‘yicha qo‘mita hamda O‘zbekiston musulmonlari idorasi haj safarlarini Saudiya Arabistoni bilan tuzilgan rasmiy kelishuvlar asosida tashkil etadi.
Rasmiy bayonotda qayd etilishicha, Saudiya Arabistoni qonunchiligiga muvofiq, haj ziyorati faqat vakolatli tashkilotlar orqali amalga oshirilishi mumkin. Noqonuniy yo‘llar bilan hajga borish qonunbuzarlik hisoblanib, deportatsiya va katta miqdordagi jarimalarga sabab bo‘lishi mumkin.
Shu munosabat bilan fuqarolarga haj safarini faqat rasmiy, davlat tomonidan tashkil etiladigan yo‘nalishlar orqali amalga oshirish tavsiya etildi.
