“Artistlarning kiyinishi tartibga solinadi” — Madaniyat vazirligi
“Bugun bizni ham qiynaydi sanʼatkorlarning ijtimoiy tarmoqlardagi chiqishlari, ochiq-sochiq kiyinishlari. Agar qonunchilikda bu borada chora ko‘rish bo‘yicha meʼyoriy hujjat qabul qilinsa, vazirlik ham madaniyat vakillariga o‘z o‘rnida chora ko‘rib boradi”, - dedi jurnalistlar bilan bo‘lib o‘tgan matbuot anjumanida vazirlik masʼuli.
Madaniyat vazirligi so‘nggi vaqtlarda ijtimoiy tarmoqlarda sanʼat sohasi vakillarining haddan ortiq ochiq-sochiq kishinishi-yu, behayo chiqishlariga befarq emas va hatto qarshi. Bu haqda vazirlik tomonidan OAV vakillari uchun o‘tkazilgan matbuot anjumanida maʼlum qilindi, deya xabar qilmoqda zamon.uz jurnalisti.
“Sizlarni o‘ylantirayotgan savol bizni ham qiynaydi. Yoshlarning kelajagi sanʼatkorlarning yurish-turishiga bog‘liq. Chunki ularning har bittasining muxlislari bor, ayrimlariniki millionlab. Biz ham shunaqa videolar chiqqanda ko‘ramiz, izohlarni o‘qiymiz, 99 foiz odam qarshi ekanini ko‘ramiz, shu qarshi fikrlar bizni quvontiradi. 10 yillar avval sanʼatkorlar bu masalada qattiqroq ushlanar edi. Hozir erkinlik, barcha sohada demokratiya. Afsuski bundan ko‘pchilik to‘g‘ri foydalanmaydi. Biroq bu narsa yaqin vaqtda tartibga tushadi”, — dedi Madaniyat vaziri o‘rinbosari Murodjon Majidov.
Shuningdek mazkur masalada vazirlik matbuot kotibi Sirojiddin O‘sarov bir paytlar millionlab tomoshabinlar muxlislik qilgan ayrim sanʼat vakillari bugunga kelib ijtimoiy tarmoqlarda behayo chiqish qilib, barchaning nafratiga uchrayotgani haqida gapirdi. Unga ko‘ra, Madaniyat vazirligi erkin ijodkorlarning yurish-turishi, ochiq-sochiq kiyinishi va ijtimoiy tarmoqlardagi o‘rinsiz chiqishlarini nazorat qila olmaydi.
“Vazir Ozodbek Nazarbekov shunaqa bitta-ikkita odamning nomaqbul harakati deb butun Madaniyat vazirligi tomonidan qilinayotgan islohotlar yopilib ketyapti, deydilar. O‘sha artistlar ham qachonlardir sizning ham bizning ham kumerimiz edi. Bugun ularning chiqishlarini ko‘rib, nega Madaniyat vazirligi qaramayapti, chora ko‘rmayapti deyishadi. Ular bir paytlar vazirlik tizimida faoliyat yuritar edi. Biroq hozirda erkin ijodkor. Tarmoqlarda sahiflarini yuritadigan bloger.
Qaysi blogerga kiyimiga qarab, chora ko‘rildi? Yaqinda vazir Ozodbek Nazarbekov Parlamentda “Madaniyatning chegarasi qayerda” degan o‘rinli savol qo‘ydi. Muhim savol. Agar rostdan ham chegarasi belgilanib berilib, sanʼatkorlarning chiqishlari va kiyinishlari borasida aniq tartib qo‘yilib, jazolash bo‘yicha meʼyoriy hujjat bilan qonuniylashtirilsa, vazirlik ham albatta chora ko‘radi”, - dedi vazir maslahatchisi O‘sarov.
