Men Tramp ma’muriyatidan qo‘rqmayman — Rim papasi
Papa Leo XIV hech qanday bahsga kirishmasligini aytib, dunyoni tinchlik va yarashuvga chaqirishda davom etishini bildirdi.
Rim-katolik cherkovi rahbari Papa Leo XIV AQSh prezidenti Donald Trampning Eron urushi fonida bildirgan tanqidlariga javob qaytardi. U Vatikan pozitsiyasi Injil ta’limotiga asoslanishini ta’kidlab, Tramp ma’muriyatidan qo‘rqmasligini ma’lum qildi.
Ma’lum qilinishicha, papa Jazoyirga parvoz chog‘ida jurnalistlarga bergan intervyusida o‘z chiqishlari siyosiy hujum emasligini urg‘uladi. Uning so‘zlariga ko‘ra, tinchlik va yarashuvga chaqiriqlar cherkovning asosiy vazifasi bo‘lib, u bundan voz kechmaydi.
Papa Leo XIV o‘z xabarini Trampning bayonotlari bilan tenglashtirish noto‘g‘ri ekanini aytib, bu Injil xabarining mohiyatini tushunmaslik ekanini bildirdi. U, shuningdek, bahsga kirishmasligini, lekin tinchlik tarafdori sifatidagi pozitsiyasini qat’iy davom ettirishini ta’kidladi.
Papa urushlarni kuchaytirayotgan “hamma narsaga qodirlik xayoli”ni tilga olib, Eron bilan bog‘liq mojaro va boshqa global ziddiyatlar fonida dunyoni tinchlikni saqlashga chaqirdi.
“Biz siyosatchi emasmiz va tashqi siyosatga boshqacha nuqtayi nazardan qaraymiz”, — dedi u. Shu bilan birga, davlatlar o‘rtasida muammolarni hal qilish uchun muloqot va ko‘p tomonlama hamkorlik zarurligini qayd etdi.
Papa Leo XIV tinchlikni targ‘ib qilishda davom etishini, urushlardan qochish yo‘llarini izlash va insonlarni yarashuvga chaqirishni o‘z missiyasi deb hisoblashini bildirdi.
Uning so‘zlariga ko‘ra, bugungi kunda ko‘plab begunoh insonlar halok bo‘lmoqda va aynan shuning uchun bundan yaxshiroq yo‘l borligini aytadigan ovozlar zarur.
Avvalroq Tramp Rim Papasining tinchlik haqidagi bayonotlarini tanqid qilganidan so‘ng o‘zini “shifo beruvchi avliyo” qiyofasida tasvirlangan suratini e’lon qilgani haqida xabar berilgandi.
