AQSh va Eron yaqin kunlarda to‘g‘ridan-to‘g‘ri muzokaralarni tiklashi mumkin — Reuters
Manbalarga ko‘ra, Tehron muzokaralarning yangi bosqichiga tayyor, AQSh pozitsiyasi esa hali noma’lum.
Reuters agentligi manbalariga tayanib xabar berishicha, AQSh va Eron o‘rtasida to‘g‘ridan-to‘g‘ri muzokaralarni qayta boshlash masalasi muhokama qilinmoqda.
Ma’lumotlarga ko‘ra, ikki davlat delegatsiyalari yaqin kunlarda Islomobod shahriga tashrif buyurishi mumkin. Muzokaralarning aniq sanasi hozircha e’lon qilinmagan, biroq manbalardan birining ta’kidlashicha, delegatsiyalar juma kunidan yakshanbagacha bo‘lgan muddatda uchrashuv o‘tkazish imkoniyatini ko‘rib chiqmoqda.
Agentlikka ko‘ra, Eron tomoni muzokaralarning navbatdagi bosqichiga tayyor ekanini vositachi sifatida ishtirok etayotgan Pokiston hukumatiga ma’lum qilgan. Shu bilan birga, Oq uyning ushbu ehtimoliy uchrashuv bo‘yicha rasmiy pozitsiyasi hozircha ochiqlanmagan.
CNN telekanali xabariga ko‘ra, AQSh rasmiylari ehtimoliy sana va joy masalasini muhokama qilmoqda. Kanal manbalari muzokaralarni “dastlabki bosqichda” deb baholab, ularning o‘tkazilishi mintaqadagi vaziyat yaqin kunlarda yaxshilanishiga bog‘liq ekanini qayd etgan.
Avvalroq The Atlantic nashri jurnalisti Arash Azizi uchrashuv 16-aprel kuni bo‘lib o‘tishi mumkinligini ilgari surgan edi.
Eslatib o‘tamiz, delegatsiyalarning avvalgi uchrashuvi 11-aprel kuni bo‘lib o‘tgan bo‘lib, bu 1979-yilda Islom Respublikasi tashkil etilganidan beri ikki davlat o‘rtasidagi eng yuqori darajadagi muloqotlardan biri sifatida baholangan. Biroq ushbu uchrashuv yakunlari kutilgan natijani bermaganini ma’lum qilingan edi.
