“Qahramonimizsan, shuni bilgin”: Mirziyoyev Sindarovni tarixiy g‘alaba bilan tabrikladi
Prezident yosh grossmeysterga bo‘lajak o‘yinlarda yanada ulkan omad, kuch-g‘ayrat va yangi zafarlar tiladi.
O‘zbekiston Prezidenti Shavkat Mirziyoyev shaxmat bo‘yicha FIDE Nomzodlar turniri g‘olibi Javohir Sindarov bilan telefon orqali suhbatlashdi.
Davlat rahbari yosh grossmeysterni O‘zbekiston shaxmat tarixida ilk bor ushbu nufuzli musobaqada zafar qozonib, tarixiy natijaga erishgani bilan samimiy tabrikladi.
Suhbat davomida Sindarovning turnirda yuqori darajadagi o‘yin namoyish etib, 13 partiyada 6 ta g‘alabaga erishgani sport olamida kam uchraydigan natija ekani ta’kidlandi. Prezident Sindarovning dunyoning yetakchi shaxmatchilariga qarshi bahslarda jasorat, yuqori mahorat, kuchli iroda va intellektual salohiyat namoyon etganini qayd etdi.
Prezident Sindarovni “qahramon” deya ta’riflab, yil oxirida bo‘lib o‘tadigan jahon toji uchun bahsda ham g‘alaba qozonishiga ishonch bildirdi va unga omad tiladi. Davlat rahbari sportchining ota-onasi, yaqinlari hamda murabbiylarini ham ushbu tarixiy g‘alaba bilan tabrikladi.
O‘z navbatida, Sindarov bildirilgan e’tibor va samimiy tilaklar uchun Prezidentga minnatdorlik izhor etdi.
Ma’lumot uchun, Sindarov avvalroq 2025-yilgi FIDE Jahon kubogida erishgan g‘alabasi uchun “O‘zbekiston Respublikasida xizmat ko‘rsatgan sportchi” faxriy unvoni bilan taqdirlangan.
Shuningdek, unga Prezident sovg‘asi sifatida uch xonali xonadon topshirilgan, murabbiylari esa pul mukofotlari bilan rag‘batlantirilgan.
Nomzodlar turniri g‘olibi sifatida Sindarov amaldagi jahon chempioni Gukesh Dommaraju ga qarshi jahon toji uchun bahs olib borish huquqini qo‘lga kiritdi. Turnirning aniq sanasi va o‘tkazilish joyi keyinroq FIDE tomonidan e’lon qilinadi.
