Qirgʻizistonda Qamchibek Tashiyevga yaqin shaxslar hibsga olindi
Sobiq yuqori lavozimli amaldorlar va biznes vakillari qo‘lga olingan.
Qirgʻizistonda xavfsizlik tizimi doirasida keng ko‘lamli tergov harakatlari olib borilmoqda. Harbiy prokuratura tomonidan Milliy xavfsizlik davlat qo‘mitasi tizimida bir qator hibsga olishlar amalga oshirildi. Bu haqda 24.kg nashri xabar berdi.
Tergov doirasida asosiy shaxslardan biri sifatida qo‘mitaning sobiq raisi o‘rinbosari Timur Shabdanbekov ko‘rilmoqda. U mansab vakolatini suiiste’mol qilishda gumon qilinmoqda.
Mazkur jinoyat ishi doirasida amaldagi va sobiq maxsus xizmat xodimlari, shuningdek biznes va davlat sektori vakillari ham qo‘lga olingan. Xususan, Akilbek Mamatov hamda Bekzat Abdikaxarov hibsga olinganlar qatoridan joy olgan.
Tergov jarayonlari mamlakat xavfsizlik tizimida amalga oshirilayotgan keng qamrovli o‘zgarishlar fonida kechmoqda. Avvalroq Sadir Japarov tomonidan Qamchibek Tashiyev lavozimidan ozod etilgan edi. Shundan so‘ng, idora faoliyati yuzasidan keng ko‘lamli audit boshlangan.
OAV ma’lumotlariga ko‘ra, hibsga olingan shaxslarning ayrimlari avvalgi rahbariyatga yaqin bo‘lgan. Jumladan, ayrim biznes vakillarining xavfsizlik tizimi sobiq rahbariyati bilan uzoq yillik aloqalari qayd etilmoqda.
Bundan tashqari, ushbu jarayonlar doirasida qo‘mita raisining yana bir sobiq o‘rinbosari — Daniel Risaliev ham hibsga olingan, keyinchalik esa uy qamog‘iga o‘tkazilgan.
Hozirda tergov harakatlari davom etmoqda. Harbiy prokuratura ish tafsilotlarini oshkor etmayapti, biroq ayrim gumonlanuvchilarning mol-mulki musodara qilingani ma’lum qilingan.
