Toshkent viloyatida sintetik giyohvand modda saqlagan bank xodimlari ushlandi
Shuningdek, Rossiyadan keltirilgan sintetik narkotik moddalar tarqalishining oldi olindi.
Toshkent viloyatida “Alfa-PVP” sintetik giyohvandlik vositalari musodara qilindi. Bu haqda DXX xabar berdi.
Ma’lum qilinishicha, Toshkent shahrida yashovchi, 1993-yilda tug‘ilgan, muqaddam sudlangan va hozirda probatsiya nazoratida bo‘lgan shaxs hamda uning 1995-yilda tug‘ilgan sherigi Yuqorichirchiq tumanidagi dala hududida yashirilgan joydan 2 kilogramm 381 gramm “Alfa-PVP” sintetik giyohvandlik vositasini olib chiqayotgan vaqtida Davlat xavfsizlik xizmati Toshkent viloyati boshqarmasi va bojxona organlari xodimlari tomonidan qo‘lga olindi.
Dastlabki ma’lumotlarga ko‘ra, ushbu giyohvandlik vositalari “Telegram” messenjeridagi internet narkodo‘kon orqali Rossiya Federatsiyasidan olib kirilgan.
Shuningdek, yana bir holatda Yangiyo‘l shahrida faoliyat yurituvchi tijorat banklaridan birining 2 nafar mutaxassisi avval narkokuryerlar Yangiyo‘l tumanidagi dala maydoniga yashirib ketgan 485 gramm “Alfa-PVP” sintetik giyohvandlik vositasini qabul qilib olib, tanishining xonadonida saqlayotganliklari aniqlandi. Ko‘rilgan chora-tadbirlar natijasida ulardan ushbu giyohvandlik vositasi ashyoviy dalil sifatida olindi.
Mazkur holatlar yuzasidan jinoyat ishlari qo‘zg‘atilib, gumonlanuvchilarga nisbatan qamoq ehtiyot chorasi qo‘llanildi.
Hozirda tergov harakatlari olib borilmoqda.
