AQSh va Eron sulhni yana ikki haftaga uzaytirishni ko‘rib chiqmoqda — Bloomberg
Eron ham, AQSh ham harbiy harakatlarni qayta boshlashni istamasligi aytilmoqda.
AQSh va Eron 21-aprelda muddati tugaydigan vaqtinchalik sulhni tinchlik kelishuvi bo‘yicha muzokaralar o‘tkazish uchun yana ikki haftaga uzaytirish imkoniyatini ko‘rib chiqmoqda, deya xabar bermoqda Bloomberg.
Agentlik suhbatlashgan manbaning aytishicha, AQSh va Eron o‘rtasidagi vositachilar eng bahsli masalalarni, xususan, Hormuz bo‘g‘ozida kemalar qatnovini qayta tiklash va Eronning uranni boyitish muammosini hal qilish uchun texnik muzokaralarni tashkil etishga urinmoqda.
AQSh rasmiylaridan biri Bloomberg‘ga sulhni uzaytirish bo‘yicha hech qanday kafolat yo‘qligini aytgan. Uning so‘zlariga ko‘ra, Vashington hozircha bunga rozilik bermagan. Eron Tashqi ishlar vazirligi esa vaziyat yuzasidan izoh so‘ralganda javob qaytarmagan.
Muzokaralar jarayonidan xabardor yana bir manba Eron ham, AQSh ham harbiy harakatlar qayta boshlanishini istamasligini bildirgan.
AQSh va Eron 8-apreldan boshlab ikki haftaga mo‘ljallangan vaqtinchalik o‘t ochishni to‘xtatish bo‘yicha kelishuvga erishgan edi. Shundan so‘ng tomonlar Islomobodda muzokaralar o‘tkazgan, biroq urushni yakunlash bo‘yicha kelishuvga erisha olmagan.
The New York Times avval xabar qilganidek, muzokaralarda AQSh Erondan uranni 20 yil davomida boyitmaslikni talab qilgan, Tehron esa 5 yillik muddatni ilgari surgan. Muzokaralarning yana bir muhim mavzusi Hormuz bo‘g‘ozi orqali dengiz tashuvlarini qayta ochish bo‘lgan. Bu bo‘g‘ozdan odatda dunyodagi neft yetkazib berishlarning beshdan biri o‘tadi. Biroq asosiy kelishmovchilik nuqtasi Eronning yadroviy dasturidan voz kechishi masalasi bo‘lib qolmoqda.
Pakistan Geo telekanali manbalarga tayanib, AQSh va Eron o‘rtasidagi muzokaralarning ikkinchi raundi kelasi hafta oxirida, 26-aprel bilan yakunlanadigan haftada Islomobodda o‘tishi mumkinligini bildirgan.
AQSh prezidenti Donald Tramp 14-aprel kuni 28-fevralda boshlangan urush “yakunlanishga yaqin” ekanini aytgan.
