O‘zbekistonda tadbirkorlar 1 oy ichida jarimaning yarmini to‘lasa, qolganidan ozod qilinadi
Sud tomonidan jarima qarori bekor qilinsa yoki haqiqiy emas deb topilsa, undirilgan pullar qaytariladi.
O‘zbekistonda tadbirkorlar 1 oy ichida jarima miqdorining 50 foizini to‘lasa, qolgan qismini to‘lashdan ozod etiladi. Bu haqda Prezidentning tegishli qarorida belgilandi.
“Moliyaviy jarimalarni qo‘llash tartibini yanada liberallashtirish va sud nazorati samaradorligini oshirish bo‘yicha qo‘shimcha choralar to‘g‘risida”gi Prezident qaroriga ko‘ra, 2026-yil 1-oktyabrdan tadbirkorlar vakolatli organ tomonidan qo‘llangan moliyaviy jarimani o‘z tanloviga ko‘ra ikki xil tartibda to‘lash imkoniyatiga ega bo‘ladi. Birinchi shaklda, qaror topshirilgan kundan boshlab tadbirkor 1 oy ichida jarimaning 50 foizini to‘lash orqali qolgan qismidan ozod etilish mumkin. Ikkinchi shakl esa jarima summasini 6 oy davomida teng ulushlarda bo‘lib-bo‘lib to‘lashni nazarda tutadi.
Shuningdek, agar moliyaviy jarima qo‘llash to‘g‘risidagi qaror sud tomonidan bekor qilinsa yoki haqiqiy emas deb topilsa, undirilgan mablag‘lar 15 kun ichida to‘liq qaytarilishi belgilangan.
Qarorga muvofiq, belgilangan muddatda qaytarilmagan mablag‘lar uchun har bir kechiktirilgan kunga Markaziy bankning asosiy stavkasiga bog‘langan holda foiz hisoblanadi. Bu stavka har bir kalendar kuni uchun asosiy stavkaning 300 dan biri miqdorida belgilangan.
