Prezident Shavkat Mirziyoyev uy-joy kommunal xizmat ko‘rsatish sohasi xodimlarini kasb bayrami bilan tabrikladi

Prezident Shavkat Mirziyoyev uy-joy kommunal xizmat ko‘rsatish sohasi xodimlarini 18-aprel — uy-joy kommunal xizmat ko‘rsatish sohasi xodimlari kuni munosabati bilan samimiy tabrikladi.

 

Davlat rahbari tabrigida kommunal soha xodimlarining fidokorona mehnati mamlakatimiz aholisining farovon hayotini ta’minlash, shahar va qishloqlarda zamonaviy infratuzilma yaratish hamda qulay yashash sharoitlarini shakllantirishda muhim ahamiyat kasb etayotgani alohida ta’kidlandi.

 

Prezident so‘zlariga ko‘ra, so‘nggi yillarda mamlakatimizda uy-joy kommunal xo‘jaligi tizimini modernizatsiya qilish, boshqaruv tizimini takomillashtirish va xizmatlar sifatini oshirish bo‘yicha keng ko‘lamli islohotlar amalga oshirilmoqda. Xususan, ilg‘or xalqaro tajribalar asosida boshqaruv servis kompaniyalari tashkil etilib, ularning faoliyati uchun zarur huquqiy va tashkiliy sharoitlar yaratilgan.

 

Bugungi kunda mamlakatdagi 45 mingdan ortiq ko‘p qavatli uylarning 90 foizdan ortig‘iga 1 mingdan ziyod boshqaruv tashkilotlari xizmat ko‘rsatmoqda.

 

So‘nggi 9 yil davomida 3,7 trillion so‘mlik mablag‘lar hisobidan 51 mingga yaqin uy-joy ta’mirlandi, 3,5 mingdan ortiq lift zamonaviy yangisiga almashtirildi.

 

Shuningdek, sohada raqamlashtirish jarayonlari jadal davom etmoqda. Natijada 42 mingga yaqin ko‘p qavatli uy va 1,5 milliondan ortiq mulkdor “Mening uyim” billing tizimida ro‘yxatga olindi. Bu esa boshqaruv tashkilotlari faoliyatini shaffof kuzatish va baholash imkonini bermoqda.

 

Kommunal infratuzilmani rivojlantirish yo‘nalishida ham katta natijalarga erishildi. Jumladan, 3 400 ta ichimlik va oqova suv inshooti hamda 42 ming kilometrdan ortiq suv tarmoqlari qurildi va rekonstruksiya qilindi. Natijada aholining markazlashgan ichimlik suvi bilan ta’minlanish darajasi 2017-yildagi 63 foizdan bugungi kunda qariyb 83 foizga yetdi.

 

Issiqlik ta’minoti tizimini modernizatsiya qilish doirasida 100 ga yaqin qozonxona va 1 276 kilometr issiqlik tarmoqlari yangilandi va ta’mirlandi. 3 800 dan ortiq ko‘p qavatli uy hamda 371 ta ijtimoiy obyekt issiqlik ta’minoti tizimiga ulandi.

 

Davlat rahbari kelgusidagi ustuvor vazifalarga ham to‘xtalib, 2030-yilgacha aholini markazlashgan ichimlik suvi bilan ta’minlash darajasini 90 foizga yetkazish, 103 ta yangi qozonxona va 1 600 kilometr issiqlik tarmoqlarini barpo etish hamda rekonstruksiya qilish rejalashtirilganini ta’kidladi. Shuningdek, davlat-xususiy sheriklik asosida va xalqaro moliya institutlari ishtirokida 13 ta yirik investitsiya loyihasini amalga oshirish ko‘zda tutilgan.

 

Prezident o‘z tabrigida kommunal soha oldida turgan ulkan vazifalarni amalga oshirishda soha xodimlarining bilim va tajribasi, fidoyiligi va mas’uliyati hal qiluvchi ahamiyatga ega ekanini qayd etdi.

 

Tabrik yakunida davlat rahbari barcha soha xodimlariga sihat-salomatlik, oilaviy baxt-saodat, ishlarida muvaffaqiyat va yurtimiz taraqqiyotiga qo‘shayotgan hissalari uchun chuqur minnatdorlik bildirdi.