IDF Hizbulloh qurolsizlantirilmaguncha Livandagi operatsiyalarni davom ettiradi
Livan armiyasi Isroilni sulh bitimini buzishda aybladi.
Isroil mudofaa kuchlari (IDF) Hizbulloh to‘liq qurolsizlantirilmagunga qadar Livan janubidagi harbiy operatsiyalarni davom ettirish niyatida ekanini ma’lum qildi.
Mudofaa vaziri Israel Katzning bayonotiga ko‘ra, IDF tomonidan nazoratga olingan hududlar saqlab qolinadi va bundan keyin ham ushlab turiladi. Uning ta’kidlashicha, Isroilning asosiy maqsadi Hizbullohni harbiy yoki siyosiy yo‘llar bilan qurolsizlantirishdan iborat.
Shuningdek, Katz xavfsizlik zonasi va Litani daryosi oralig‘idagi hudud hali ham qurolli guruhlar va harbiy texnikadan to‘liq tozalanmaganini bildirgan. Unga ko‘ra, ushbu maqsadga siyosiy muzokaralar orqali yoki sulh muddati tugaganidan so‘ng harbiy amaliyotlarni davom ettirish orqali erishilishi mumkin.
Ayni paytda Livan armiyasi Isroilni sulh bitimini buzishda ayblab, mamlakat janubidagi Xiyom shahriga zarba berilganini ma’lum qildi.
Avvalroq AQSh prezidenti Donald Tramp Isroil va Livan rasmiylari o‘rtasida o‘n kunlik sulh bo‘yicha kelishuvga erishilganini bildirgan edi.
