Namangandagi tibbiyot muassasalarida iste’molchilardan 300 million so‘m asossiz olingan
Narxnomada ko‘rsatilgan, ammo amalda ishlatilmagan materiallar uchun ham fuqarolardan to‘lov undirilgan.
Namangan viloyatidagi qator tibbiyot muassasalarida iste’molchilardan asossiz undirilgan qariyb 300 million so‘m mablag‘ni qayta hisob-kitob qilish bo‘yicha ko‘rsatma berildi. Bu haqda Raqobat qo‘mitasi xabar berdi.
Ma’lum qilinishicha, tekshiruvlar Raqobat qo‘mitasining Namangan viloyati hududiy boshqarmasi tomonidan Sog‘liqni saqlash vazirligi tizimidagi To‘raqo‘rg‘on, Uychi, Uchqo‘rg‘on, Chortoq va Yangiqo‘rg‘on tuman tibbiyot birlashmalarida o‘tkazilgan.
O‘rganishlar davomida tibbiyot muassasalarida qo‘llanilayotgan o‘lchash va sinash vositalari belgilangan muddatlarda metrologik ko‘rikdan o‘tkazilmagani holda bemorlarga xizmat ko‘rsatilgani aniqlangan. Shuningdek, narxnomada ko‘rsatilgan, ammo amalda ishlatilmagan materiallar uchun ham fuqarolardan to‘lov undirilgan.
Natijada, tibbiyot birlashmalari tomonidan qariyb 300 million so‘m miqdorida asossiz daromad olingani ma’lum bo‘ldi.
Mazkur holat yuzasidan hududiy boshqarmaning maxsus komissiyasi tomonidan “Iste’molchilarning huquqlarini himoya qilish to‘g‘risida”gi Qonun hamda Vazirlar Mahkamasining sohada xizmat ko‘rsatish tartibini belgilovchi qarorlari talablari buzilgani bo‘yicha ish qo‘zg‘atilgan.
Ishni ko‘rib chiqish yakunlariga ko‘ra, tibbiyot muassasalariga iste’molchilardan asossiz undirilgan mablag‘larni belgilangan tartibda qaytarish yuzasidan majburiy ko‘rsatmalar berildi.
