O‘rta Chirchiqdagi hodisa “portlash” emas — FVV
Favqulodda vaziyatlar vazirligi 4 kishi halok bo‘lgan yong‘in yuzasidan rasmiy izoh berdi.
Favqulodda vaziyatlar vazirligi ayrim ijtimoiy tarmoqlarda tarqalgan “O‘rta Chirchiqdagi xonadonda portlash: 4 kishi vafot etdi” mazmunidagi xabarlar yuzasidan rasmiy izoh berdi.
Ma’lum qilinishicha, joriy yil 16-aprel kuni soat 01:44 da “112” tizimi orqali Toshkent viloyati Favqulodda vaziyatlar bosh boshqarmasiga O‘rta Chirchiq tumani “O‘rta Ovul” MFY hududidagi xonadonlardan birida yong‘in sodir bo‘layotgani haqida xabar kelib tushgan.
Xabarga asosan qutqaruvchilar zudlik bilan voqea joyiga yetib borib, yong‘inni tezkorlik bilan bartaraf etgan. Afsuski, yong‘in oqibatida 4 nafar fuqaro vafot etgan.
Vazirlik tomonidan qayd etilishicha, ayrim ijtimoiy tarmoqlarda ushbu holat “portlash” sifatida talqin qilingan, biroq rasmiy ma’lumotlarga ko‘ra, xonadonda portlash sodir bo‘lmagan.
Dastlabki surishtiruvlarga ko‘ra, yong‘in xavfsizligi qoidalarining buzilishi, xususan uyda foydalanilgan elektr jihozlari quvvatiga mos bo‘lmagan elektr simlar hamda noto‘g‘ri tanlangan saqlagichlar sabab bo‘lishi mumkinligi taxmin qilinmoqda.
Hozirda holat yuzasidan tergovga qadar tekshiruv ishlari olib borilmoqda.
