Siyosatdan K-pop’gacha: TIME 2026-yilning eng nufuzli 100 kishisini e’lon qildi

Time jurnali 2026-yil uchun dunyoning eng nufuzli 100 kishisi (TIME 100) ro‘yxatini e’lon qildi. Unda siyosat, san’at, sport, biznes va boshqa sohalarda faoliyat yuritayotgan yetakchi shaxslar jamlangan.

 

“Yetakchilar” bo‘limidan AQSh prezidenti Donald Tramp, Rim papasi Leo XIV, Meksika prezidenti Klaudia Sheynbaum, AQSh davlat kotibi Marko Rubio, Kanada bosh vaziri Mark Karni, Isroil bosh vaziri Binyamin Netanyahu, Kaliforniya gubernatori Gavin Nyusom, MAGATE rahbari Rafael Grossi hamda Xitoy yetakchisi Si Jinping o‘rin olgan.

 

Ayrim siyosatchilar ushbu ro‘yxatga bir necha bor kiritilgan. Xususan, Binyamin Netanyahu bu ro‘yxatdan beshinchi bor joy olgan. Donald Tramp va Si Jinping ham muntazam ravishda ta’sir doirasi kuchli shaxslar qatoriga kirib keladi.

 

“Artistlar” bo‘limiga xonanda Lyuk Kombs, K-pop yulduzi Jenni, aktrisalar Dakota Jonson va Reya Sihorn, aktyor Jonatan Groff kiritilgan.

 

“Pionerlar” qatoridan amerikalik kosmonavt, Artemis II missiyasi ishtirokchisi Reyd Vaysman, Uolt Disney vakili Josh D’Amaro, oshpaz Nensi Silverton va boshqalar joy olgan.

 

“Titanlar” ruknida golfchi Skotti Sheffler, dizayner Ralf Lauren, Dell asoschisi Maykl Dell va uning rafiqasi Syuzan Dell, shuningdek Paramount Skydance rahbari David Ellison qayd etilgan.

 

“Ikonalar” bo‘limidan aktyor Etan Havke, modelyer Viktorya Bekham, braziliyalik aktyor Vagner Moura o‘rin olgan.

 

“Innovatorlar” qatoriga poygachi Lando Norris, Anthropic bosh direktori Dario Amodey hamda Walmart rahbari Jon Furner kiritilgan.

 

Time jurnali ushbu reytingni 1999-yildan buyon e’lon qilib keladi. Dastlab u XX asrning eng muhim 100 shaxsini o‘z ichiga olgan bo‘lsa, 2004-yildan boshlab har yili tuziladigan global nufuz reytingiga aylangan.

 

Eslatib o‘tamiz, 2025-yilda jurnal “Yil odami” sifatida sun’iy intellekt sohasidagi yetakchilarni tanlagan edi.