Tramp Isroilga Livanga hujum qilishni ta'qiqladi

 

AQSh prezidentining ma’lum qilishicha, Isroil Livanga qarshi harbiy zarbalarni to‘xtatadi. U bu qaror AQSh tomonidan tegishli taqiq qo‘yilgani bilan bog‘liqligini ta’kidlab, “yetar” degan mazmunda qat’iy pozitsiya bildirgan. Ushbu bayonot Trampning Truth Social ijtimoiy tarmog‘idagi sahifasida e’lon qilingan.

 

Ma’lumot uchun, bir kun avval AQSh prezidenti Isroil va Livan o‘rtasida 10 kunlik sulhga erishilganini ma’lum qilgan edi.

 

Shuningdek, Tramp Eron bilan bog‘liq masalalarga ham to‘xtalib, avvalgi harbiy zarbalar oqibatida yuzaga kelgan yadroviy xavf bilan bog‘liq hududlarni tozalash jarayonlari AQSh ishtirokida amalga oshirilishini bildirgan.

 

Uning qayd etishicha, Eron Hormuz bo‘g‘ozini yopmaslikka rozi bo‘lgan va ushbu strategik yo‘nalish endilikda global savdoga qarshi “qurol” sifatida ishlatilmaydi. Tramp, shuningdek, bo‘g‘ozni minalardan tozalash jarayonida Amerika kuchlari ishtirok etishini ham ta’kidlagan.

 

Oq uy rahbari Eron bo‘yicha kelishuv Livan masalasiga aloqador emasligini aytgan holda, AQSh “Livanni qayta tiklash” bo‘yicha ham tashabbuslarni davom ettirishini bildirgan.

 

Avvalroq Isroil va Livan o‘rtasida 1993-yildan buyon ilk bor yuqori darajadagi muzokaralar o‘tkazilgani va bu jarayon Vashington vositachiligida amalga oshirilgani qayd etilgan edi.