O‘zbekiston bank tizimi aktivlari 932 trln so‘mdan oshdi
Banklarning sof foydasi o‘tgan yilning mos davriga nisbatan 36,3 foizga ko‘payib, 3,1 trln so‘mga yetgan.
2026-yilning birinchi choragi yakunlariga ko‘ra, O‘zbekiston bank tizimining jami aktivlari 932,3 trln so‘mni (76,3 mlrd dollar), majburiyatlari esa 793,9 trln so‘mni (64,9 mlrd dollar) tashkil etdi. Bu haqda Iqtisodiy tadqiqotlar va islohotlar markazi tomonidan e’lon qilingan “Banklar faollik indeksi” hisobotida ma’lum qilindi.
Hisobotga ko‘ra, mamlakat bank sektorida o‘sish sur’atlari saqlanib qolmoqda. Xususan, kredit qo‘yilmalari 14 foizga, depozitlar esa 32 foizga oshgan. Banklarning sof foydasi o‘tgan yilning mos davriga nisbatan 36,3 foizga ko‘payib, 3,1 trln so‘mga (254 mln dollar) yetgan. Shu bilan birga, muammoli kreditlar ulushi 4,5 foizdan 3,3 foizgacha kamaygan.
Yirik banklar segmentida yetakchilik saqlanib qolgan. Xususan, Kapitalbank reytingda birinchi o‘rinni egallab turibdi. Umuman olganda, 20 ta yirik bankdan 7 tasi o‘z pozitsiyasini yaxshilagan, 8 tasi pastlagan, 5 tasi esa o‘z o‘rnini saqlab qolgan. Eng katta o‘sish Tenge Bank hissasiga to‘g‘ri kelib, u 6 pog‘onaga ko‘tarilib, umumiy reytingda 10-o‘ringa chiqdi.
Shuningdek, Hamkor bank, Aziya Alyans bank va Ipak yo‘li bank 1 pog‘onadan, Xalq banki, Invest finans bank va Agrobank esa 2 pog‘onadan yuqorilagan. Aksincha, Oriyent finans bank 5 pog‘onaga, Trast bank esa 3 pog‘onaga pastlagan.
Alohida ko‘rsatkichlar kesimida yetakchilar ham aniqlangan. Moliyaviy vositachilik yo‘nalishida Invest finans bank, Anor bank va Kapitalbank oldingi o‘rinlarni egallagan bo‘lsa, moliyaviy ommaboplik bo‘yicha Agrobank, Anor bank va BRB yetakchilik qilgan. Kapital yetarliligi bo‘yicha Oriyent finans bank, Trast bank va Xalq banki yuqori natija ko‘rsatgan. Aktivlar sifati yo‘nalishida Hamkor bank, Aziya Alyans bank va Ipak yo‘li bank yetakchi bo‘lgan. Boshqaruv samaradorligi bo‘yicha O‘zsanoatqurilishbank, Oriyent finans bank va O‘zmilliybank yuqori o‘rinlarni egallagan. Daromadlilikda Hamkor bank, Trast bank va Aziya Alyans bank, likvidlilikda esa Aziya Alyans bank, Ipak yo‘li bank va Trast bank yetakchi sifatida qayd etilgan.
Kichik banklar segmentida ham raqobat kuchaygan. 14 ta bankdan 8 tasi o‘z o‘rnini yaxshilagan. Ushbu guruhda TBC Bank reyting yetakchisi sifatida qayd etilgan. Eng sezilarli o‘sish AVO bank va Apex bank hissasiga to‘g‘ri kelib, ular 3 pog‘onadan yuqorilagan. Shuningdek, Soderot bank, Garant bank va Ziraat bank 2 pog‘onadan, Open bank va Uzum bank esa 1 pog‘onadan o‘sish qayd etgan. Oktobank esa 6 pog‘onaga tushib, eng katta pasayishni ko‘rsatgan.
Ma’lumot uchun, mazkur tadqiqot respublikada faoliyat yuritayotgan 34 ta tijorat bankini qamrab olgan bo‘lib, ularning 20 tasi yirik, 14 tasi kichik banklar toifasiga kiradi. Indeks 27 ta ko‘rsatkich asosida, jumladan xalqaro standartlar va Bazel qo‘mitasi talablariga muvofiq shakllantirilgan.
