AQShning Eronga qarshi urushi yaqin kunlarda qayta boshlanishi mumkin — Axios
Sulh bitimi tugash arafasida, yangi muzokara sanasi hali belgilanmagan.
Axios nashrining AQSh rasmiylariga tayanib xabar berishicha, AQSh prezidenti Donald Tramp shanba kuni Oq uyda Hormuz bo‘g‘ozi atrofidagi vaziyat hamda Eron bilan davom etayotgan muzokaralarga bag‘ishlangan maxsus yig‘ilish o‘tkazgan.
Manbalarga ko‘ra, Eron bilan bog‘liq vaziyat muhim bosqichga yetgan bo‘lib, amaldagi sulh kelishuvi uch kun ichida yakunlanishi kutilmoqda. Shu bilan birga, AQSh va Eron delegatsiyalari o‘rtasidagi navbatdagi uchrashuv sanasi hozircha rasman belgilanmagan.
Nashr qayd etishicha, Eronning Hormuz bo‘g‘ozini yana yopishi hamda ayrim kemalarga hujumlar sodir bo‘lgani haqidagi xabarlar Trampning “yaqin bir-ikki kun ichida kelishuvga erishish mumkin” degan bayonotidan ko‘p o‘tmay paydo bo‘lgan.
AQShning yuqori martabali rasmiysi so‘zlariga ko‘ra, agar qisqa muddat ichida muzokaralarda siljish bo‘lmasa, harbiy harakatlar yaqin kunlarda qayta boshlanishi mumkin.
Brifingda vitse-prezident J.D. Vance, Davlat kotibi Marko Rubio, Mudofaa vaziri Pit Hegset, G‘aznachilik vaziri Skott Bessent hamda milliy xavfsizlik tizimining boshqa yuqori lavozimli vakillari ishtirok etgani ma’lum qilingan.
