Eronga qarshi hujumlar mintaqaga jiddiy ta’sir ko‘rsatmoqda — Erdo‘g‘an
Turkiya urushni to‘xtatish uchun diplomatik sa’y-harakatlarni kuchaytirayotganini ma’lum qildi.
Turkiya prezidenti Rajab Toyyib Erdo‘g‘an Antaliya diplomatik forumi doirasida Iroq Kurd mintaqasi rahbari Nechirvan Barzani bilan uchrashuv o‘tkazdi.
Turkiya Prezident ma’muriyati ma’lumotiga ko‘ra, muzokaralar davomida tomonlar mintaqadagi so‘nggi siyosiy va xavfsizlik vaziyatini batafsil muhokama qilgan.
Erdo‘g‘an Eronga qarshi amalga oshirilayotgan hujumlar oqibatida yuzaga kelgan keskinlik butun mintaqaga jiddiy ta’sir ko‘rsatayotganini ta’kidlagan. Uning so‘zlariga ko‘ra, Turkiya urushni to‘liq to‘xtatish va barqaror tinchlik muhitini yaratish maqsadida diplomatik sa’y-harakatlarni kuchaytirmoqda.
Turkiya rahbari, shuningdek, Eron atrofidagi vaziyat fonida ilgari surilayotgan separatistik ssenariylar hech bir tomon manfaatiga xizmat qilmasligini qayd etdi. U Iroqdagi barqarorlik va xavfsizlikni saqlash ustuvor vazifa bo‘lib qolayotganini bildirgan.
Bundan tashqari, Erdo‘g‘an Hormuz bo‘g‘ozi atrofidagi voqealar neft ta’minoti yo‘llarini diversifikatsiya qilish zaruratini yana bir bor ko‘rsatganini aytgan.
Shu munosabat bilan u “Taraqqiyot yo‘li” loyihasining strategik ahamiyatini alohida ta’kidlagan.
