Xitoyda yarim marafonda robotlar ilk bor odamlarni ortda qoldirdi
Honor roboti 21 kilometr masofani 50 daqiqa 26 soniyada bosib o‘tgan.
Xitoy poytaxti Pekin shahrida gumanoid robotlar ishtirokidagi yarim marafon musobaqasi bo‘lib o‘tdi. Unda robotlar ilk bor inson yuguruvchilarni ortda qoldirgani ma’lum qilindi.
Musobaqada rasmiy g‘olib deb topilgan Honor nomli robot 21 kilometr masofani 50 daqiqa 26 soniyada bosib o‘tgan. Mazkur natija yarim marafon bo‘yicha insonlar o‘rtasidagi amaldagi jahon rekordidan ham yaxshiroq ko‘rsatkich sifatida qayd etildi.
Taqqoslash uchun, yarim marafon bo‘yicha insonlar rekord natijasi mart oyida Portugaliyaning Lissabon shahrida ugandalik yuguruvchi Yakob Kiplimo tomonidan qayd etilgan bo‘lib, u masofani taxminan 57 daqiqada yakunlagan edi.
Xalqaro agentliklar ma’lumotiga ko‘ra, bu ko‘rsatkich o‘tgan yilgi natijalarga nisbatan sezilarli o‘sishni namoyon etgan. O‘tgan yil ilk bor o‘tkazilgan shunday poygada g‘olib robot marraga 2 soat 40 daqiqa 42 soniyada yetib kelgan, ko‘plab robotlar esa masofani yakunlay olmagan edi.
Bu yilgi musobaqada insonlar va robotlar bir vaqtning o‘zida, biroq xavfsizlikni ta’minlash maqsadida alohida yo‘laklarda harakatlangan.
Musobaqada ishtirok etgan jamoalar soni 20 tadan 100 tadan oshgan, robotlarning qariyb yarmi masofani mustaqil ravishda yakunlagani aytilmoqda.
Shuningdek, yo‘nalish turli qoplamalar va qiyalikli hududlardan iborat bo‘lib, o‘tgan yilgiga nisbatan murakkabroq bo‘lgan.
Musobaqa davomida ayrim texnik holatlar ham kuzatilgan. Xususan, bir robot start vaqtida yiqilgan, yana biri esa marra chizig‘idan o‘tgach to‘siqqa urilgan.
